इंग्ल्याण्डका लागि केनको ह्याट्रिक, पानामा विरुद्ध गोलको वर्षा

काठमाडौं–पानामा विरुद्धको खेलमा तीन गोल गर्दै इंग्ल्याण्डका टीम कप्तान केनले ह्याट्रिक गरेका छन् । जारी विश्वकपमा यो दोस्रो ह्याट्रिक हो । यस अघि पोर्चुगलका खेलाडी क्रिस्टियानो रोनाल्डोले पहिलो ह्याट्रिक गरेका हुन । 

उनको ह्याट्रिकसँगै इंग्ल्याण्डले ६ गोलको अग्रता लिएको छ । दबाबमा परेको पानामा विरुद्ध इंग्ल्याण्डले पहिलो हाफ सकिँदा पाँच गोल गरेको थियो । 

खेलको आठौ मिनेटमा पहिलो गोल गरेका जे स्टोन्सको अग्रतालाई दोब्बर बनाउँदै टोलीका कप्तान केनले पेनाल्टी मार्फत गोल अन्तरलाई दोब्बर बनाएका थिए ।

त्यसपछि खेलको ३६ औ मिनेटमा लिंगाडले तेस्रो गोल गरेका थिए । खेलको ३९ औ मिनेटमा फेरि स्टोन्सले दोस्रो गोल गर्दै दुई टीमबीचको अन्तर चार शुन्य बनाएको थियो । 

त्यसपछि पाएको पेनाल्टीमा फेरि कप्तान केनले पाँचौ गोल गरे । दोस्रो हाफको खेल शुरु भएपनि पनि केनले अर्को गोल गर्दै गोल अन्तर ६-० पुर्‍याए । जारी प्रतियोगितामा केनको यो व्यक्तिगत पाँचौ गोल हो ।