विश्वकपमा आज तीन खेल, कसले मार्ला बाजी

काठमाडौं- रुसमा जारी विश्वकप फुटबल प्रतियोगिता अन्तर्गत शनिबार तीन खेल हुँदैछन् ।

साँझ पौने ६ बजे हुने पहिलो खेलमा बेल्जियम र ट्युनिसिया आमन्ने सामन्ने हुनेछन् । बेल्जियमले पानामालाई ३-० गोल अन्तरले पराजित गर्दै तीन अंक प्राप्त गरेको छ । त्यस्तै ट्युनिसिया इंग्ल्याण्यसँग २-१ ले पराजित भएको थियो । शनिबारको खेल जिते बेल्जियम अन्तिम १६ मा पुग्ने सम्भावना बढ्नेछ । ट्युनिसियाको जित पनि अघिल्लो चरणका प्रवेशका लागि उत्तिकै महत्वपूर्ण छ ।

त्यस्तै प्रतियोगिता अन्तर्गत दोस्रो खेल दक्षिण कोरिया र मेक्सिकोबीच हुनेछ । राति पौने नौ बजे शुरु हुने खेललाई निक्कै रोचक हुने खेलप्रेमीको विश्वास छ । मेक्सिकोले डिफेन्डिङ च्याम्पियन जर्मनीलाई २-० ले पराजित गर्दै तीन अंक जोडेको छ ।

दक्षिण कोरियालाई पनि हराएर अघिल्लो चरणमा जाने योजनाका साथ मेक्सिको मैदानमा उत्रँदैछ । पहिलो जितका लागि मैदानमा उत्रने कोरिया यसअघिको खेलमा स्वीडेनसँग १-० ले पराजित भएको थियो ।

त्यस्तै प्रतियोगिता अन्तर्गत राति पौने १२ बजे हुने खेलमा डिफेन्डिङ च्याम्पियन जर्मनी र स्वीडेन भिड्नेछन् । मेक्सिकोसँग पराजित जर्मनी स्वीडेन विरुद्ध कडा रुपमा प्रस्तुत हुने तयारीका साथ मैदान उत्रने योजनामा हुँदा कोरियालाई हराएर उच्च मनोबलमा रहेको स्वीडेन दुवै खेल जित्ने लक्ष्यका साथ मैदान उत्रँदैछ ।

यसअघि शुक्रबार भएका खेलमा ब्राजिलले कोस्टारिकालाई, नाइजेरियाले आइसल्याण्डलाई र स्वीट्जरल्याण्डले सर्वियालाई पराजित गरेको छ ।