ओलम्पिकका खेलाडीले आफै मेडल लगाउनुपर्ने

काठमाडौं- कोभिड–१९ को महामारीको प्रभावका कारण टोक्यो ओलम्पिकमा मेडल जित्ने खेलाडीले अब आफूले धारण गर्ने मेडल आफै लगाउनुपर्ने भएको छ। कोरोना भाइरसको संक्रमणबाट जोगिन आयोजले खेलाडी आफैले मेडल लगाउनु पर्ने नियम ल्याएको हो।

‘ओलम्पिकमा हुने ३ सय ३९ इभेन्टको मेडल सेरेमोनीबारे अन्तर्राष्ट्रिय ओलपम्पिक कमिटी (आईओसी)ले नयाँ नियम ल्याएको छ,’ आईओसीका अध्यक्ष थोमस ब्याचले बुधबार भने।

‘अब मेडल खेलाडीको घाँटीमा लगाइने छैन,’ अध्यक्ष ब्याचले अन्तर्राष्ट्रिय मिडिया प्रेस कन्फरेन्समा भने, ‘ट्रेमा एथ्लिटका लागि मेडल राखिएको हुन्छ। त्यहाँबाट उनीहरूले मेडल लगाउनेछन्।’

यता ट्रेमा मेडल राख्ने मानिसले पनि डिसइन्फेक्ट गरिएको पञ्जा लगाएर काम गर्नु पर्नेछ। जसले एथ्लिटलाई मेडलको सुरक्षामा विश्वास हुनेछ।

त्यस्तै, ब्याचले प्रतियोगिताको दौरान हात मिलाउने र अंकमाल गर्न पाउने छैनन्। यता पुरस्कार वितरण उत्सवमा सबैले मास्क लाउनुपर्ने छ।

जापानको टोक्योमा आउँदो जुलाई २३ बाट ओलम्पिक सुरु हुँदैछ। यता, टोक्योमा कोभिड-१९ को केसहरू पनि बढिरहेका छन्।