कांग्रेसको १९ बुँदे हेटौंडा घोषणापत्र : पार्टीको नैतिक विजय

हेटौंडा- १९ बुँदे हेटौंडा घोषणापत्र जारी गर्दै कांग्रेस जिल्ला सभापतिहरूको भेला सकिएको छ । 

घोषणा पत्रमा सभापति भेलामा आएका सुझावको एउटा बुँदा मात्र समेटिएको छ, जसमा प्रादेशिक संरचनामा जाने गरी विधान संशोधन गर्ने उल्लेख छ । निर्वाचनको समीक्षा र आगामी कार्यदिशा निर्माण गर्ने गरी जिल्ला सभापतिहरूको भेला डाकिएको थियो । 

नेतृत्वले भने विधानको अक्षरशः पालना गर्ने बुँदाले निर्वाचनको समीक्षाको भावना समेट्ने दाबी गरेको छ । 

भेलाका लागि केन्द्रले जिल्ला सभापतिहरूलाई सात बुँदे प्रश्न सोधेको थियो । तर, ती प्रश्नको जवाफ के आयो भन्ने घोषणापत्रमा समेटिएको छैन । 

१९ बुँदे घोषणापत्रमा संघीय संरचनाबमोजिम संगठन विस्तार गर्न आवश्यक विधान संशोधनका लागि महासमिति बैठक बोलाउने उल्लेख छ । 

हरेक दुई वर्षमा जिल्ला सभापतिहरूको भेला आयोजना गर्ने बुँदा पनि उल्लेख छ । उक्त प्रावधान विधानमै उल्लेख गर्न माग गरिएको छ । घोषणापत्रमा त्यसका लागि अनुरोध गर्ने उल्लेख छ । विधान संशोधनका लागि आएका सुझावबारे पनि घोषणापत्र मौन छ । 

वर्तमान सरकारप्रति भने घोषणापत्रका बुँदा आक्रामक छन् । सुर्खेतस्थित पार्टी कार्यालयमा भएको जस्तो आक्रमण भएमा प्रतिरोध गर्ने उल्लेख छ । महँगी वृद्धि रोक्न नसकेकामा सरकारको आलोचना गरिएको छ । 

संविधान संशोधनको मुद्दामा तत्कालीन एमालेको पराजय र कांग्रेसको नैतिक विजय भएको निष्कर्ष घोषणापत्रमा उल्लेख छ । मधेशकेन्द्रित दलहरूको माग सम्बोधन गर्न संविधान संशोधन गर्ने कुरालाई तत्कालीन एमालेले राष्ट्रघात भनेको थियो । 

सरकार अधिनायकवादतर्फ उन्मुख भएको निष्कर्ष पनि घोषणापत्रमा समेटिएको छ ।