विश्व बैंकले स्वास्थ्य मन्त्रालयलाई हस्तान्तरण गर्‍यो ९८२ थान अक्सिजन कन्सन्ट्रेटर

काठमाडौं- कोरोना महामारीविरुद्ध स्वास्थ्य क्षेत्रको क्षमता अभिवृद्धि गर्न विश्व बैंकको सहयोगमा खरिद गरिएका १० लिटर क्षमताका ९८२ थान अक्सिजन कन्सन्ट्रेटर नेपाल सरकारलाई हस्तान्तरण गरिएको छ।

नेपाल, माल्दिभ्स र श्रीलङ्काका लागि बैंकका देशीय निर्देशक फारिस हादाद जेर्भोसले स्वास्थ्य तथा जनसङ्ख्यामन्त्री शेरबहादुर तामाङलाई ती उपकरण हस्तान्तरण गरेका हुन्। 

ती उपकरण यथाशक्य चाँडो सातवटै प्रदेशस्थित स्वास्थ्य प्रतिष्ठानहरुमा पुर्‍याइने मन्त्री तामाङले बताएका छन्। निर्देशक जेर्भोसले अहिलेको असहज अवस्थामा विकासका साझेदारसँग मिलेर नेपाल र नेपालीलाई सघाउन बैंक प्रतिबद्ध रहेको बताए।

बैंकको कोभिड–१९ आपत्कालीन प्रतिकार्य तथा स्वास्थ्य प्रणाली तयारी परियोजनाअन्तर्गत प्रदान गरिएको रकमबाट परियोजना सेवाका लागि  संयुक्त राष्ट्रसङ्घीय कार्यालयले ती अक्सिजन कन्सन्ट्रेटर खरिद गरेको हो। उक्त कार्यालयले आगामी छ देखि १५ साता भित्रमा सातवटै प्रदेशस्थित प्रदेश अस्पतालमा अक्सिजन उत्पादन गर्ने उपकरण जडान एवं सञ्चालन गरिसक्ने बैंकले जनाएको छ।

9⃣8⃣2⃣ units of 10-liter oxygen concentrators arrived in #Nepal today; 7⃣ oxygen generation plants expected to arrive in the coming weeks.

Proud to see @WorldBank financing make a difference in Nepal's #COVID19 response!

➡️ https://t.co/iFrKIolQ7x pic.twitter.com/7okaDfywbe

— Faris H. Hadad-Zervos (@WorldBankNepal) June 19, 2021