३६ करोड लिएर इटहरीका तीन व्यापारी बेपत्ता

इटहरी- घटना १: स्थानीय रुचि हार्डवेयरका सञ्चालक ग्राहक, व्यापारी, वितरक र बैंकको आठ करोड रुपैयाँभन्दा बढी लिएर १२ असोज ०७४ देखि बेपत्ता भए । भारत विहारको अररियाका ५५ वर्षीय अरविन्दकुमार अग्रवाल आठ महिनायता सम्पर्कविहीन छन् । 

उनले ग्राहकबाट उठाउन करिब एक करोड र तिर्न बाँकी नौ करोड रुपैयाँ छ । इलाका प्रहरी इटहरीमा उजुरी परे पनि उनीबाट पैसा फिर्ता पाउने आधार नभएकाले तनावमा छन्, पीडितहरू । 

घटना २: इटहरी-६ लक्ष्मण मार्गस्थित हटिया लाइनका व्यापारी भुलन जैसवाल चौधरी पनि २० वैशाखदेखि बेपत्ता छन् । उनकी श्रीमती पनि २१ वैशाखदेखि सम्पर्कमा छैनन् । 

दार्जिलिङमा अध्ययनरत छोरालाई स्कुलबाट निकालिसकेका छन्, उनीहरूले । इटहरीको चर्चित ओम साई किराना तथा कैलाश किराना नाममा दुई व्यापारिक फर्मका सञ्चालक चौधरी विभिन्न व्यापारी र सर्वसाधारणको करिब १२ करोड रुपैयाँ लिएर फरार भएका हुन् । 

हालसम्म उजुरी दिएका २४ जना व्यापारीमध्ये सबैभन्दा बढी व्यवसायी कृष्ण श्रेष्ठको ६० लाख रुपैयाँ डुबेको छ । उद्योग वाणिज्य संघ, इटहरीका महासचिव टंक खनालकै पनि नौ लाख रुपैयाँ लिएर फरार भएका छन्, उनी । 

भारत विहारको मुरलीगञ्ज मूल घर भएका भनिएका व्यापारी चौधरी अहिले त्यहाँ पनि नभएको परिवार स्रोतले बताएको छ ।
 

वर्षदिनयता दुई भारतीय र एक नेपाली व्यापारी बैंक र सर्वसाधारणको ३६ करोड रुपैयाँ लिएर बेपत्ता ।

घटना ३: गत २२ जेठमा इटहरी-२० तरहरास्थित सिंहदेवी ज्वेलर्सका सञ्चालक दीपक गजमेर पनि फरार भएका छन् ।  सयौं स्थानीय बासिन्दालाई महँगो व्याज दिने बताएर उनले करिब १६ करोड रुपैयाँ उठाएका थिए । 

उनीविरुद्ध परेको उजुरीका आधारमा गजमेरको खोजी भइरहेको इलाका प्रहरीका डीएसपी शिवकुमार श्रेष्ठले जानकारी दिए ।

इटहरीका बैंक र व्यापारीहरूले विश्वास गरेका व्यापारीहरू नै करोडौं उठाएर फरार हुने गरेका छन् । शुरुमा विश्वास आर्जन गर्न त्यस्ता व्यापारीले राम्रो पृष्ठभूमि बनाउँछन् र त्यसैको आडमा ग्राहकलाई बेवकुफ बनाउँदै रकम लिएर फरार हुन्छन् । 

ठूलो कारोबार गरिरहेका व्यापारीलाई बैंकहरूले पनि भरोसा गर्नु स्वाभाविकै हो । तर, तिनै व्यापारी रकम लिएर फरार हुन थालेपछि बैंक अधिकारीहरू ऋण दिन सचेत हुन थालेका छन् । 'क' वर्गको एक बैंकका व्यवस्थापक भन्छन्, 'ठूला व्यापारी फरार हुँदा सर्वसाधारण र बैंक दुवैको पैसा धरापमा पर्दोरहेछ ।'