आजका अखबारः सुन तस्करीकाे अनुसन्धान त्रुटिपूर्ण !

काठमाडौं- राजधानीबाट सोमबार प्रकाशित राष्ट्रिय दैनिक पत्रिकाहरुले फरक फरक विषयलाई पहिलो प्राथमिकतामा पारेका छन् । 

सुन तस्करी र हत्या आरोपी छिरिङ घले थुनामा परेको खबरलाई आजको कान्तिपुर दैनिकले मुख्य समाचार बनाएको छ । पूर्वप्रहरी अधिकारीहरुले सुन तस्करीका विषयमा भइरहेको अनुसन्धान त्रुटिपूर्ण भएको औल्याएका छन् । कान्तिपुरले यो खबरलाई पनि प्राथमिकताका साथ छापेको छ । 

कान्तिपुरले सुरक्षित मातृत्व तथा प्रजनन् स्वास्थ्यको व्यवस्था गर्न बनेको विद्येयकमा सुत्केरीलाई ९८ दिन बिदा दिन प्रस्ताव गरिएको खबरलाई पनि महत्वका साथ पहिलो पृष्ठमा छापेको छ । यो खबर अनुसार अब बलपूर्वक परिवार नियोजन गराउन र गर्भपतन गराउन पाइने छैन् । 

आजको नागरिक दैनिकले भने के गर्दैछन् भिआईपी कैदी ? शीर्षकमा खबर छापेको छ । यस्तै सर्वोच्चको आदेश विपरित पूर्वराज ज्ञानेन्द्र शाहकी छोरी प्रेरणाले विजया घर छाड्न अटेर गरेको विषयलाई पनि नागरिकले प्राथमिकताका साथ छापेको छ । 

अन्नपूर्ण पोष्टले एमाले र माओवादीको एकता पछि बनेको नेपाल कम्युनिस्ट पार्टीको तल्लो तहसम्म हुने एकीककरणको स्वरुपलाई मुख्य समाचार बनाएको छ भने पेन्सनमै सरकारको ४६ अर्ब २३ करोड खर्च हुने गरेको विषयलाई पनि महत्वका साथ छापेको छ । 

नयाँ पत्रिकाले उर्जा क्षेत्रको स्थिती र चुनौती दर्शाउने गरि उर्जाको परिक्षा शीर्षकमा रिपोर्ट छापेको छ । उसले ठेकेदारको लापरबाहीका कारण पाँचपटक म्याद थप्दा पनि सडक अपुरै रहेको विषयलाई विशेष प्राथमिकता दिएर छापेको छ ।