कामचोर ठेकेदारविरुद्ध उत्रिए अखबार 

काठमाडौं- आइतबार राजधानीबाट प्रकाशित राष्ट्रिय दैनिक पत्रिकाहरुले फरक फरक विषयलाई मुख्य समाचार बनाएका छन् । 

ठेकेदारको लापरबाहीले हद नाघेपछि सरकार कडा रुपमा प्रस्तुत हुन लागेको विषयलाई आजको नयाँ पत्रिका र नागरिक दैनिकले मुख्य समाचार बनाएका छन् । नयाँ पत्रिका दैनिकले काठमाडौंको सडकको अवस्था दर्शाउदै ठेकेदारको लापरबाहीका कारण सडक दयनीय बनेको उल्लेख गरेको छ । 

उसले लेखेको छ– ठेक्का लिन साम दाम दण्ड भेद प्रयोग गर्ने ठेकेदार निर्माणमा उदासीन बन्दा जनता सास्ती खेप्न बाध्य छन् । सरकार काम नगर्ने ठेकेदारमाथि कारबाही गर्ने तयारीमा छ । ठेकेदारले अदालत, अख्तियार र स्थानीय अवरोधलाई बाहनाका रुपमा प्रयोग गर्दै आएको नयाँ पत्रिकाले लेखेको छ ।
 
यस्तै नागरिक दैनिकले कामचोर ठेकेदार शीर्षकमा कभर स्टोरी छापेको छ । कर्णाली ब्युरोले लेखेको यो खबर अनुसार सम्झौताअनुसार काम सम्पन्न नगर्ने ठेकेदारको नाम र आयोजनाको विवरण धमाधम संकलन गरेर गृहमन्त्रालयमा पठाइँदैछ । समयमै काम सम्पन्न नगर्ने स्थानीय उपभोत्ता समितिलाई पनि कारबाहीको दायरामा ल्याइएको छ । 

आजको कान्तिपुर दैनिकले भने तीनै तहमा गरि १ लाख ११ हजार कर्मचारी आवाश्यक पर्ने एक सर्वेक्षणले देखाएको खबरलाई विशेष प्राथमिकताका साथ पहिलो पृष्ठमा छापेको छ । कर्मचारी संगठन तथा व्यवस्थापन सर्वेक्षण अनुसार संघमा ३० हजार, प्रदेशमा २१ हजार र स्थानीय तहमा ६० हजार कर्मचारी आवाश्यक पर्छ । जसअनुसार २५ हजार नयाँ कर्मचारी आवाश्यक पर्छ ।