विराट गोल्डकपको सेमिफाइनलमा संकटा

विराटनगर – संकटा क्लव विराटनगरमा जारी छैठौं विराट गोल्डकपको सेमिफाइनलमा प्रवेश गरेको छ। 

सहिद मैदानमा मंगलबार राति सम्पन्न अन्तिम क्वाटरफाइनल खेलमा क्यामरुनको अफ्रिकन रुट्स एसोसिएसनलाई १–० गोलले हराउँदै संकटा सेमिफाइनल प्रवेश गरेको हो। 

जितसँगै संकटाले बिहीबार दोस्रो सेमिफाइनल खेलमा भारतको पन्जावपुलिस क्लबसँग प्रतिस्पर्धा गर्नेछ। 

अन्तिम क्वाटरफाइनल खेलमा दुवै टिम आक्रमक देखिएपछि पहिलो हाफसम्म दुवै टिमले गोल रहित बराबरी खेले। संकटाको जितका लागि ६१औं मिनेटमा गणेश हमालले गरेको गोल नै जितका लागि निर्णायक बन्यो। संकटाका विदेशी खेलाडी ओडी गोल्रीले क्रस साइटदेखि निकालिएको पास गणेशले हेडमार्फत गोल पोस्टमा पुगाए।

पहिलो गोल खाएपछि दबाबमा परेको क्यामरुनले खेल बराबारीमा ल्याउन निकै संघर्ष गर्‍यो। तर, सफलहुन सकेन। पोखरामा सम्पन्नभएको आरा रारा गोल्डकपमा हार व्यवहोरेपछि विराट गोल्डकपमा बदला लिने क्यामरुनको रणनीति पनि बिफल भएको छ। दुवै टिम आक्रामक देखिए पनि डिफेन्सलाइनको कमजोरीले क्यामरुन दोस्रो हाफमा १–० ले पछि पर्‍यो। 

खेलको म्यानअफ द म्याच संकटाका गोल रक्षक राजाबावु थापा घोषित भए। उनले नगद १० हजार प्राप्त गरे। प्रतियोगिताअन्तर्ग बुधबार साँझ विराटनगर–११ र शसस्त्रको एपीएफवीच खेल हुने छ।