एपीएफ ललितपुर मेयर कप क्रिकेटको फाइनलमा

काठमाडौं – सशस्त्र प्रहरीको विभागीय टिम एपीएफ ललितपुर मेयर कप महिला टी–२० क्रिकेटको फाइनलमा प्रवेश गरेको छ।

कीर्तिपुरस्थित त्रिभुवन विश्वविद्यालयको मैदानमा मंगलबार सम्पन्न खेलमा ललितपुर मेयर ११ लाई १० विकेटले हराउँदै एपीएफ फाइनलमा पुगेको हो।

टस जितेर ब्याटिङ रोजेको मेयर ११ ले पूरा ओभर खेल्दै ९ विकेटको क्षतिमा ६६ रन जोडेको थियो। ६७ रनको सामान्य लक्ष्य एपीएफले विना विकेट क्षतिमा नौ ओभर एक बल खेल्दै पूरा गरेको थियो।

एपीएफको जितका लागि रजमती ऐरी र इन्दु बर्माले क्रमशः ३३ र २८ रन बनाए। 

त्यसअघि मेयर ११ का कञ्चन श्रेष्ठ, सन्तोषी चौधरी र सरस्वती कुमारीले क्रमशः १७, १३ र १२ रन बनाउनुबाहेक अन्य खेलाडीले दोहोरो अंकमा रन बनाउन सकेनन्।

एपीएफकी विनु बुढाले चार विकेट लिइन् भने रेखा रावलले मेयर ११ को दुई विकेट गिराइन्।  त्यस्तै सुमन विष्ट, करुण भण्डारी र सिता राना मगरले समान १–१ विकेट लिए।

विजेता एपीएफले तीन खेलबाट ६ अंक जोडेको छ भने समानत तीन खेलबाट मेयर ११ ले दुई अंक जोडेको छ।

आजको अर्को खेलमा प्रदेश १ ले सुदूरपश्चिमको सामना गर्दै छ। यसअघिको खेलमा प्रदेश १ ले लुम्बिनी प्रदेशलाई १० विकेटले हराएको थियो।