एपीएफलाई फाइनलमा पुग्ने अवसर

काठमाडौं– ललितपुर मेयर कप महिला टी२० क्रिकेट च्याम्पियनसिपअन्तर्गत आज दुई खेल हुँदैछन्।

कीर्तिपुरस्थित त्रिवि क्रिकेट मैदानमा हुने आजको पहिलो खेलमा ललितपुर मेयर ११ ले विभागीय टिम एपीएफको सामना गर्नेछ। यदि एपीएफले आजको खेलमा जित निकाल्न सकेको खण्डमा उसले फाइनल खेल्न पाउनेछ।

एपीएफले मेयर ११ लाई हराउन सके उसले सिधै फाइनलमा स्थान बनाउनेछ। यता मेयर ११ ले जित निकाले पनि उसलाई फाइनल पुग्न अर्को एक खेलमा भर पर्नुपर्ने छ। साथै एपीएफले पनि फाइनल पुग्ने सम्भावना अर्को खेलसम्मका लागि यथावत् रहनेछ।

आजको अर्को खेलमा प्रदेश १ ले सुदूरपश्चिमका सामना गर्नेछ। यी दुवै टिम एक जित र एक हारको अवस्थामा छन्। आजको खेलमा जित निकाल्ने टिमलाई फाइनल पुग्न सहज हुनेछ।

प्रदेश १ ले पहिलो खेलमा एपीएफसँग हार बेहोरेको थियो भने लुम्बिनीविरुद्ध जित निकालेको थियो। त्यस्तै मेयर ११ लाई हराएको सुदूरपश्चिमले एपीएफसँग हार बेहोरेको थियो।