किरण चेम्जोङ ‘मार्च फुटबल विन्डो’का सर्वाधिक लोकप्रिय एसियाली खेलाडी

काठमाडौं– एसियाली फुटबल महासंघ (एएफसी)ले जारी गरेको १० खेलाडीको पोलमा सर्वाधिक मत पाउँदै नेपाली राष्ट्रिय टिमका कप्तान लोकप्रिय खेलाडी बनेका छन्।

एएफसीले इन्टरनेसनल विन्डोमा फुटबल समर्थकलाई उत्साहित बनाउन र खेलाडीको प्रवर्द्धनका लागि पोल सार्वजनिक गर्ने गरेको थियो। यसै सिलसिलामा पछिल्लो विन्डोमा नेपाली खेलाडी पनि एएफसीको शीर्ष १० खेलाडीमा अटाउन सफल भएका थिए।

बाँकी खेलाडीहरुमा यूएईका अली मब्खोट, कतारका मोहम्मद मुन्तरी, जापानका युया ओसाको, इरानका सरदार अम्जोउन, साउदी अरेबियाका सलेह अल शेहरी, इराकका आला अली मह्वी, बहराइनका मोहम्मद मर्होन, ताजकिस्तानका अलिशहेर जेहालिलोव र जोर्डनका मुसा अल तामरी थिए।

बाँकी सबै प्रतिस्पर्धीलाई पछि पार्दै किरण लोकप्रिय खेलाडी बनेका हुन्। उनले सम्पूर्ण भोटको सर्वाधिक ५५.६९ प्रतिशत मत प्राप्त गरे। दोस्रो हुने साउदी अरेबियाका सहेह अल शेहरीले २०.७२ प्रतिशत मत प्राप्त गरेका छन्।

किरणले पछिल्ला तीन अन्तर्राष्ट्रिय खेलमध्ये दुई क्लिन सिट राखेका थिए भने बंगलादेशसँगको खेलमा एक गोलको सामना गरेका थिए। यससँगै उनले थ्री नेसन्स कपको उपाधि पनि जिते।