आठ महिनामा ५४ अर्ब रुपैयाँको खाद्यान्न आयात

काठमाडौं– सरकारले खाद्यान्नमा आत्मनिर्भर बन्ने योजना बर्सेनि सार्वजनिक गरे पनि परनिर्भरता भने चुलिँदै गएको छ। चालू आर्थिक वर्षको पहिलो ८ महिनामा आयात भएको खाद्यान्नबाट पनि परनिर्भरता बढ्दै गएको प्रष्ट हुन्छ। 

आवको साउनदेखि फागुनसम्म करिब ५४ अर्ब रुपैयाँबराबरको खाद्यान्न आयात भएको तथ्यांक छ। भन्सार विभागका अनुसार धान, चामल, गहुँ, मकै, कोदो र फापर ५३ अर्ब ९७ करोड १८ लाख रुपैयाँबराबरको आयात भएको छ।

यो अवधिमा सबैभन्दा बढी ३५ अर्ब १५ करोड ३४ लाख रुपैयाँबराबरको ९ लाख ४८ हजार ८४० टन धान तथा चामल आयात भएको छ।

त्यसैगरी १० अर्ब ४१ करोड ९६ लाखबराबरको ४ लाख १८ हजार ७४८ टन मकै आयात भएको छ। ७ अर्ब ८५ करोड ८५ लाखबराबरको २ लाख ५० हजार १०५ टन गहुँ तथा गहुँको बिउ आयात भएको भन्सार विभागको तथ्यांक छ।

आवको सो अवधिमा ५४ करोड १ लाख रुपैयाँबराबरको १६ हजार ११२ टन कोदो तथा फापर आयात भएको छ। खाद्यान्नसँगै पेट्रोलियम पदार्थ, सवारीसाधन तथा तिनका पार्टपुर्जाको आयातसमेत उच्च छ। चालू आवको सो अवधिमा मुलुकको वैदेशिक व्यापार घाटा साढे ८ खर्ब रुपैयाँभन्दा माथि पुगेको छ।