महिलालाई जिउँदै पुरेको आरोपमा पक्राउ

धादिङ- धादिङको त्रिपुरासुन्दरी गाउँपालिका खोल्सीस्थित सडकमा महिलालाई जिउँदै खाल्डोमा हालेर पुरेको आरोपमा प्रहरीले स्काभेटरका चालकलाई पक्राउ गरेको छ।

पक्राउ पर्नेमा सल्यानको छत्रेश्वरी गाउँपालिका- ६ बस्ने २२ वर्षका जीवन भन्ने भीमबहादुर बुढाथोकी रहेका प्रहरीको केन्द्रीय अनुसन्धान ब्यूरो (सिआइबी) ले जनाएको छ। 

काम गर्ने क्रममा स्काभेटरले ठक्कर दिएपछि नजिकै रहेको खाल्डोमा पुरेर भागेका उनलाई कञ्चनपुरस्थित नेपालभारतको सीमा क्षेत्र गड्डाचौकीबाट पक्राउ गरिएको सिआइबीका निर्देशक प्रहरी नायब महानिरीक्षक सहकुलबहादुर थापाले बताए।

आज काठमाडौँमा पत्रकार सम्मेलन गरी उनलाई सार्वजनिक गरिएको छ। गएको फागुन १७ गते सडक मर्मत गर्ने क्रममा सोही ठाउँ बस्ने वर्ष ४० की सरस्वती कुमाललाई ठक्कर दिएपछि जिउँदै खोल्डोमा हालेर पुरिएको थियो।

स्काभेटरको सहयोगमा प्रहरी र स्थानीयले खाल्डोबाट उनको शव निकालेका थिए। आक्रोशित स्थानीयले सोही बेला स्काभेटरसमेत जलाएका थिए। उक्त घटनापछि बुढाथोकी फरार थिए। 

उक्त घटनाको श्रव्यदृश्य समाजिक सञ्जालमा भाइरल बनेको थियो। भागेर भारत गएकाले तत्कालै पक्राउ गर्न सकिएको थिएन। उनी एक पटक नेपालगञ्ज आएको बेलामा पिछा गरे पनि प्रहरीको हातबाट फुत्किएको थापाले बताए।

त्यसपछि भागेर भारत जाने क्रममा कञ्चनुपुरस्थित सीमा क्षेत्रबाट पक्राउ गरिएको थापाले बताए। रासस