कर्णाली प्रदेशको मुख्य न्यायाधिवक्तामा खनाल नियुक्त

सुर्खेत- कर्णाली प्रदेश सरकारका मुख्य न्यायाधिवक्तामा मातृकाप्रसाद खनाल नियुक्त भएका छन्।

कर्णाली प्रदेशका मुख्यमन्त्री महेन्द्रबहादुर शाहीको सिफारिसमा खनाल मुख्य न्यायाधिवक्तामा नियुक्त भएका हुन्। दैलेखको आठबीस नगरपालिका–२ निवासी खनाल लामो समयदेखि अधिवक्ताका रुपमा काम गर्दै आएका थिए।

तत्कालीन मुख्य न्यायाधिवक्ता विद्याभुषण मानन्धरले कार्यव्यस्तता देखाउँदै एक महिनाअघि पदबाट राजनीनामा दिएका थिए।

यसैबीच नवनियुक्त मुख्य न्यायाधिवक्ता खनालले आज (शुक्रबार) कर्णाली प्रदेशका प्रदेश प्रमुख गोविन्दप्रसाद कलौनीको उपस्थितिमा उच्च अदालत सुर्खेतका कायममुकायम मुख्य न्यायाधीश राजेश्वर तिवारीबाट पद तथा गोपनीयताको सपथ ग्रहण गरेका छन्।

सपथ ग्रहण समारोहमा कर्णाली प्रदेश सरकारका मुख्यमन्त्री महेन्द्रबहादुर शाही, कर्णाली प्रदेशसभाका सभामुख राजबहादुर शाही तथा प्रदेश सरकारका मन्त्रीहरुको उपस्थिति रहेको थियो।