उपलब्धि सुनाएर महान्यायाधिवक्ता खरेलले दिए राजीनामा

काठमाडौं– महान्यायाधिवक्ता अग्नि खरेलले राजीनामा दिएका छन्। उनले शुक्रबार पत्रकार सम्मेलन गरी राजीनामा दिएको घोषणा गरेका हुन्। उनले भने, ‘प्रधानमन्त्रीलाई भेटेर मैले राजीनामा दिएको छु।’ 

२०७४ फागुन ८ गते उनी २६ औं महान्यायाधिवक्तामा नियुक्त भएका थिए।

खरेलले आफू भिन्न परिवेशमा पदमा बहाली भएको बताए। उनले भने, ‘कतिपयले कानुनमन्त्री भइसकेको व्यक्ति किन महान्यायाधिवक्तामा गएको होला?’

खरेलले तीन वर्षकाे अवधिकमा संस्थाको भौतिक विकास, फौजदारी न्याय प्रशासनलाई अगाडि लैजाने राज्यको लक्ष्य पूरा गर्न आफूले सक्दो प्रयास गरेको बताए।

उनले ३७ महिनामा ३९ वटा भवन उद्घाटन गरिएको बताए। खरेलले महान्यायाधिवक्ता कार्यालय र सरकारी वकिलको कार्यालयको चिनिने अवस्थामा पुर्‍याएको बताए।

उनले विभिन्न कानुनसम्बन्धी नौ वटा तालिम पुस्तिका तयार पारी १५ वटा तालिम कक्षा सञ्चालन गरेको जानकारी दिए।

उनले १३० भन्दा बढी सरकारी वकिलको दरबन्दी थप गरिएको पनि बताए। दरबन्दी थप भए पनि महामारीका कारण विज्ञापन गर्न नसक्दा दरबन्दी अनुसार पदपूर्ति गर्न नसकिएको उनको भनाइ छ।