सीटीईभीटीको प्रश्नपत्र आउट गर्ने पाँच जना पक्राउ

जनकपुरधाम– प्राविधिक शिक्षा तथा व्यावसायिक तालिम परिषद् (सीटीईभीटी) को प्रश्नपत्र आउट गर्ने पाँच जनालाई प्रहरीले पक्राउ गरेको छ।

सीटीईभीटीको प्रश्नपत्र बाहिरिएपछि धनुषा प्रहरीले पाँच जनालाई जनकपुरधामबाट पक्राउ गरेको हो। 

पक्राउ परेका सबै जनकपुरधाम– ४ स्थित भैरवचोकमा फोटोकपी पसल गर्दै आएका छन्। 

भैरवचोकस्थित एक फोटोकपी पसलबाट प्रश्नपत्र आउट गरी फोटोकपी गरिरहेकै अवस्थामा उनीहरूलाई पक्राउ गरिएको जिल्ला प्रहरी कार्यालय धनुषाका प्रवक्ता प्रहरी नायब उपरीक्षक मकेन्द्रकुमार मिश्रले जानकारी दिए।

उनले परीक्षामा अनुगमन गर्ने क्रममा चिट भेटिएपछि विद्यार्थीसँगको सोधपुछका आधारमा सो फोटोकपी पसलबाट प्रश्नपत्र बाहिरिएको पत्ता लागेको थियो। 

पक्राउ परेकाको नाम भने प्रहरीले गोप्य राखेको छ। डीएसपी मिश्रले अनुसन्धानमा प्रभाव पर्न सक्ने भन्दै उनीहरूको नाम खुलाउन मानेनन्।