कांग्रेस कमजोर हुँदा देश कमजोर भयो : सुजाता 

बुटवल– नेपाली कांग्रेसकी नेतृ सुजाता कोइरालाले कम्युनिष्टहरुले गणतन्त्र र संविधान नै धरापमा पारेको टिप्पणी गरेकी छन्। उनले मुलुकले प्राप्त गरेको संघीय लोकतान्त्रिक गणतन्त्र र संविधान नै धरापमा परेको बताउँदै यसको रक्षा गर्ने जिम्मा कांग्रेसको काँधमा आएको बताइन्। 

कांग्रेसका पूर्व सभापति तथा पूर्वप्रधानमन्त्री स्वर्गीय गिरिजाप्रसाद कोइरालाको ११ औं स्मृति दिवसमा बिहीबार बुटवलमा आयोजित बिचार गोष्ठीलाई सम्बोधन गर्दै उनले यस्तो बताएकी हुन्। ‘कांग्रेस कमजोर हुँदा देश कमजोर भयो र राजनीतिक संकट निम्तियो,’ उनले भनिन्। 

उनले कम्युनिष्टहरुको सर्वसत्तावाद र अधिनायकवादका विरुद्ध कांग्रेसभित्र पनि सहमति र एकता आवश्यक रहेकोमा नेतृ कोइरालाले जोड दिइन्।

जीपी कोइराला फाउण्डेशन रुपन्देहीको आयोजनामा भएको विचार गोष्ठीमा कांग्रेस रुपन्देहीका सभापति अब्दुल रज्जाक, पूर्व सभापति रामचन्द्र ढकाल, महासमिति सदस्य युवराज गिरी, प्रदेश सांसद रमा अर्याल, पुष्पा चौधरी, बुटवल नगर सभापति खेलराज पाण्डेले बोलेका थिए।