कर्णाली प्रदेश सरकारको समर्थन कायमै छ : नेपाल समूह

सुर्खेत– एमाले माधवकुमार नेपाल समूहले कर्णाली प्रदेश सरकारलाई दिएको समर्थन कायमै रहेको स्पष्ट पारेको छ।

नेपाल समूहका नेता एवम् प्रदेशका आर्थिक मामिला तथा योजनामन्त्री प्रकाश ज्वालाले सरकारलाई दिएको समर्थन कायमै रहेको बताएका हुन्। 

उनले आज एमाले संसदीय दलको बैठक नभई गुटको बैठक भएको प्रतिक्रिया दिए। 

गुटगत बैठक प्रचलित कानुन, बिधि र प्रक्रियासम्मत नभएको उनको भनाइ छ। आफूहरुलाई औपचारिक सूचना नदिएर बोलाइएको गुटगत बैठकले गरेका भनिएका निर्णयप्रति असहमति रहेको बताए।

‘यो गुटगत बैठकले गरेका निर्णय एमाले दलको विधानसम्त छैन’, ज्वालाले भने, ‘सरकारलाई दिएको समर्थन कायमै छ।’

यसअघि बुधबार बसेको एमाले संसदीय दलको बैठकले सरकारकाट समर्थन लिने निर्णय गरेको थियो। संसदीय दलका नेता यामलाल कँडेलले सरकारमा सामेल मन्त्रीहरूलाई पाँच दिनभित्र फिर्ता बोलाउने निर्णय भएको बताएका थिए।

कर्णाली प्रदेश सरकारमा एमालेबाट आर्थिक मामिला तथा योजनामन्त्री प्रकाश ज्वाला, सामाजिक विकासमन्त्री दल रावल र उद्योग पर्यटन वन तथा वातावरणमन्त्री नन्दसिंह बुढा सरकारमा छन्।

संसदीय दलको बैठकमा एमालेका २० मध्ये १० जना सांसद सहभागी थिए। ज्वालालगायतका सांसद भने बैठकका सहभागी थिएनन्।