सेयरमा प्रभाव पार्ने खालको सूचना सार्वजनिक गरेको भन्दै निफ्रालाई नेप्सेले काट्यो पत्र

काठमाडौं – सेयर बजारमा प्रभाव पार्ने खालको समाचारहरू सार्वजनिक गरेको भन्दै नेपाल इन्फ्रास्क्ट्रचर बैंक (निफ्रा)लाई स्पष्टीकरण सोधिएको छ । 

नेपाल स्टक एक्सचेन्ज (नेप्से) ले बैंकको सेयर मूल्यलाई प्रभाव पार्ने विषयमा किन बोलेको भन्दै बैंकका प्रमुख कार्यकारी अधिकृत रामकृष्ण खतिवडालाई स्पष्टीकरण सोधेको हो। 

केही दिन अगाडि बैंकका प्रमुख कार्यकारी अधिकृत रामकृष्ण खतिवडाले पत्रकारहरूसँग बोल्दै केही वर्ष भित्रमा नै लन्डन स्टक एक्सचेन्जमा तीन अर्ब रूपैयाँ बराबरको ‘बन्ड’ जारी गर्ने बताएका थिए। 

साथै उनले आगामी वर्ष दिनभित्रमा नै १० प्रतिशत लाभांश दिनेसमेत जानकारी दिएका थिए। 

यसले बैंकको सेयरलाई प्रभाव पार्न सक्ने भएकाले स्पष्टीकरण सोधिएको नेप्सेले जनाएको छ। 

नेप्सेका कामु सहायक प्रबन्धक सुवोध ढुंगेलले तीन दिनभित्र लिखित जवाफ पेस गर्न भन्दै स्पष्टीकरण मागिएको जानकारी दिए । 

नेपाल धितोपत्र बोर्डले सेयर बजारमा प्रभाव पार्ने खालका सूचना वा समाचारहरू प्रकाशित र प्रसारित नगर्नका लागि समय–समयमा सार्वजनिक सूचना जारी गरी दोस्रो बजारमा कारोबार गर्ने संस्थाहरूलाई सजग बनाएको थियो।