ट्रक र जीप ठोक्किँदा चितवनमा एकजनाको मृत्यु

चितवन - पूर्वपश्चिम राजमार्गअन्तर्गत पूर्वी चितवनमा भएको सवारी दुर्घटनामा एकजनाको मृत्यु भएको छ। 

मृत्यु हुनेमा धादिङको धुसा गाउँपालिका-१ का २७ वर्षीय महेश फुयाल रहेको जिल्ला प्रहरी कार्यालय चितवनले जनाएको छ।

कार्यालयका प्रवक्ता प्रहरी नायव उपरीक्षक सूर्यबहादुर थापाका अनुसार काँकडभिट्टाबाट नारायणगढतर्फ आउँदै गरेको ना ८ ख १४२० नम्बरको तरकारी बोकेको ट्रक र विपरीत दिशाबाट गइरहेको बा १८ च १३७१ नम्बरको जीप राप्ती नगरपालिका–३, मार्तलपुल नजिक एकापसमा ठाेक्किएकाे हाे।

ठक्करबाट तरकारी बोकेको ट्रक सडकबाट १० मिटर तल खस्दा चालक फुयालको घटनास्थालमा नै मृत्यु भएको प्रहरीले जनाएको छ।

दुर्घटनामा परी सहचालक तनहुँको बन्दीपुर गाउँपालिका–५ का २७ वर्षीय विवेक थापा घाइते भएको प्रहरीले जनाएको छ। 

घाइते थापाको पुरानो मेडिकल कलजेमा उपचार भइरहेको छ। 

ट्रक, जीप र चालक इलाका प्रहरी कार्यालय भण्डाराको नियन्त्रणमा छन्। 

घटना आज बिहान ३ः१५ बजे भएको हो।