विधानविपरीत पदाधिकारी हटाएको भन्दै निर्वाचन आयोग पुग्यो माधव–झलनाथ समूह

काठमाडौं–  नेकपा एमालेका अध्यक्ष एवम् प्रधानमन्त्री केपी शर्मा ओलीले विधानविपरीत महाधिवेशनबाट निर्वाचित पदाधिकारी हटाएको भन्दै एमालेको माधव–झलनाथ पक्षले निर्वाचन आयोगमा निवेदन दिएको छ।

आज राजेन्द्र पाण्डेसहितका नेताहरु निर्वाचन आयोग पुगेर निवेदन दर्ता गराएका हुन्। ‘बालुवाटारमा विशेष बैठक भन्दै महाधिवेशनबाट निर्वाचित पदाधिकारी हटाइएको विषयमा जानकारी गराएका छौं,’नेता पाण्डेले भने।  

माधव–झलनाथ पक्षले आफैंले बनाएको विधानविपरीत पदाधिकारी हटाउने, नयाँ मानिसहरु नियुक्त गर्ने र जिम्मेवारी हेरफेर गर्ने काम भएको भन्दै आयोगमा निवेदन दिएका हुन्। 

प्रधानमन्त्री केपी शर्मा ओलीले बालुवाटारमा केन्द्रीय कमिटीको विशेष बैठक भन्दै केही दिनअघि एमालेको नवौं महाधिवेशनबाट निर्वाचित भएका पदाधिकारीहरुलाई जिम्मेवारीबाट मुक्त गरेका थिए।

उनले माओवादी केन्द्रका २३ जनालाई केन्द्रीय कमिटी सदस्यमा समेत नियुक्त गरेका थिए। त्यस्तै माधव झलनाथ पक्षीय नेताहरुको जिम्मेवारी खोसेर आफू निकटका मानिसहरुलाई दिएका थिए।