शिवरात्रीका लागि यस्ता छन् स्वास्थ्य सुरक्षा मापदण्ड

काठमाडौं– यस वर्षको महाशिवरात्री मनाउँदा पशुपतिनाथ मन्दिरमा दुरी कायम गर्नुका साथै स्यानिटाइजर प्रयोग गर्नुपर्ने भएको छ। 

पशुपति क्षेत्र विकास कोषले मंगलबार पत्रकार सम्मेलन गर्दै महाशिवरात्रीको तयारी अन्तिम चरणमा पुगेको जानकारी गराउँदै कोरोनाको जोखिम कायमै रहेका कारण मापदण्ड अपनाउनु पर्ने बताएको हो। 

‘कोभिड भाइरस संक्रमणको खतरा रहेको अवस्थामा नेपाल सरकारले तोकेका स्वास्थ्य सुरक्षाका मापदण्डलाई पालना गरेर सम्भव भएसम्म भौतिक दूरी कायम गर्दै स्यानिटाइजर र मास्कको प्रयोगलाई अनिवार्य गरी दर्शनको व्यवसथा मिलाइएको छ,’ पशुपति क्षेत्र विकास कोषले भनेको छ। 

कोषले शिवरात्रीको तयारी अन्तिम चरणमा पुगेको उल्लेख गर्दै दर्शनको व्यवस्थालाई प्रभावकारी बनाउन ११ सदस्यीय उपसमिति बनाएको छ।

उपसमितिले सुरक्षा व्यवस्था, स्वयंमसेवक परिचालन, वातावरण र सरसफाई, चन्दन वितरण लगायतमा दर्शनार्थीलाई सहयोग गर्नेछ।