प्रतिनिधिसभा बैठक बस्दै, यी हुन् कार्यसूची

काठमाडौं – प्रतिनिधिसभा पुनःस्थापनापछिको दोस्रो बैठक आज बस्दै छ। 

दिउँसो १ बजे बस्ने तय भएकाे बैठकमा विभिन्न अध्यादेशहरू पेस हुने छन्। 

गृहमन्त्री रामबहादुर थापाले नेपाल प्रहरी र प्रदेश प्रहरी (कार्य सञ्चालन, सुपरीवेक्षण र समन्वय) (पहिलो संशोधन) अध्यादेश २०७७, सामाजिक सुरक्षा (पहिलो संशोधन) अध्यादेश २०७७ र तेजाब तथा अन्य घातक रासायनिक पदार्थ (नियमन) अध्यादेश २०७७ पेस गर्ने कार्यसूची छ। 

त्यस्तै स्वास्थ्य तथा जनसंख्या मन्त्री हृदयेश त्रिपाठीले औषधि (तेस्रो संशोधन) अध्यादेश २०७७ र कानुन, न्याय तथा संसदीय मामिला मन्त्री लीलानाथ श्रेष्ठले फौजदारी कसूर तथा फौजदारी कार्यविधिसम्बन्धी केही ऐन संशोधन गर्ने अध्यादेश, यौन हिंसाविरुद्धका केही ऐनलाई संशोधन गर्ने अध्यादेश र बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग (तेस्रो संशोधन) अध्यादेश पेस गर्ने कार्यसूची रहेको संसद् सचिवालयले जनाएको छ। 

यस्तै आज शोक प्रस्ताव प्रस्तुत गर्ने पनि कार्यक्रम रहेको छ। 

२३ फागुनमा बसेको पहिलो बैठक कांग्रेसको अवरोध र माओवादी केन्द्रको बहिष्कारका कारण स्थगित भएको थियो।