हिउँ र जाडो छल्न घुन्साका आधा परिवारले गाउँ छाडे

ताप्लेजुङ– ताप्लेजुङको फक्ताङलुङ गाउँपालिका ६ घुन्सा गाउँमा हिमपात सुरु भएपछि आधा परिवारले जाडो छल्न गाउँ छाडेका छन्। 

घुन्सा गाउँमा हिउँ पर्न थालेपछि सात परिवार हिउँ र जाडो छल्न काठमाडौं पुगेका छन्। चार परिवार ताप्लेजुङ सदरमुकाम फुङलिङ बजारमा कोठा लिए बस्न पुगेको छन् भने एक परिवार इलामको पशुपति बजार पुगेको छ। 

घुन्सा गाउँमा २८ परिवार स्थायीरूपमा बासोबास गर्दै आएको स्थानीयवासी पेमा शेर्पाले बताए। बाह्र परिवारले हिमपातसँगै जाडो छल्न गाउँ छाडेपछि १६ परिवार मात्र घुन्सा गाउँमा रहेका छन्। 

घुन्सा विश्वको तेस्रो अग्लो कञ्चनजंधा हिमालको प्रवेशद्वारमा पर्ने एक पर्यटकीय बस्ती हो। घुन्सा गाउँमा हिमाली शेर्पा समुदायको बसोबास छ। यो गाउँ समुद्र सतहदेखि तीन हजार ५०० मिटर उचाइमा पर्छ। 

प्रत्येक वर्षको पुस, माघ र फागुन तीन महिना गाउँलाई नै हिउँले छोप्ने गर्दछ। हिउँ परेपछि पग्लेर जाँदैन। सिसाजस्तै कडा बरफ बनेर जमिरहन्छ। पग्लिन एक महिनासम्म लाग्न सक्छ। 

तीन महिना हिउँ र चिसोका कारणले निकै कष्टकर समय बिताउनु पर्ने भएकाले हिउँ र जाडो छल्न प्रत्येक वर्ष घुन्सा छाड्ने गरेको शेर्पाले बताउँछन्। 

हिमाली क्षेत्र भएकाले यहाँ खेतीपाती हुँदैन। कञ्चनजंघा हिमालको प्रवेशद्वार भएकाले यहाँको मुख्य व्यवसाय पर्यटनसँग निर्भर छ। यस वर्ष कोरोनाका कारण कञ्चनजंघामा पर्यटक आउन सकेनन्। 

पर्यटक नआएपछि आर्थिक स्रोत जुटाउन नसकेको टासी तेन्जी शेर्पाले बताउँछन्। आर्थिक अभाव र केही चौँरी याक गोठ भएकाले यस वर्ष हिउँ र जाडो छल्न १६ परिवार जान नसकेको शेर्पाले बताउँछन्।

बाह्र परिवारले संरक्षण ऋण तथा बचत सहकारीमा जम्मा गरेको बचत फिर्ता लिएर हिउँ र जाडो छल्न गएको उनले बताए। गत महिना संरक्षण ऋण तथा बचत सहकारीबाट घुन्सा गाउँका सहकारी सदस्यहरुले ११ लाख बचत फिर्ता लिएको सहकारीका वित्तीय सहजकर्ता अभिषेक केदेमले जानकारी दिए।