प्रतिनिधिसभा विघटन मुद्दा : इजलासमै जंगिए प्रधानन्यायाधीश 

काठमाडौं- संवैधानिक इजलासमा आज पनि प्रतिनिधिसभा विघटनविरुद्धको मुद्दामा निरन्तर सुनुवाइ जारी छ। 

बहसका क्रममा एक अधिवक्ताले आफ्नो बयान गर्दै इतिहास सुनाउन थालेपछि प्रधानन्यायाधीश चोलेन्द्रशमशेर जबरा जंगिएका छन्। बहस गर्ने अधिवक्ता हुन्, शेरबहादुर ढुंगाना। 

ढुंगानाले ठूलो स्वरमा आफ्नै बयान गर्न थालेपछि प्रधानन्यायाधीश जबराले उनलाई रोक्दै भने, ‘बिस्तारै बोल्नोस्, तपाईं जन्मेदेखिको कुरा यहाँ नसुनाउनोस्।’

अहिले अधिवक्ता हर्कबहादुर रावलले बहस गरिरहेका छन्। उनले अहिलेको प्रधानमन्त्रीलाई २०४७ सालको जस्तो २०७२ मा कुनै अधिकार नभएको बताए। उनले अहिले सर्वोच्च अदालतलाई संविधानको संशोधन गर्ने अधिकार नभएको पनि बताए।

यसअघि अधिवक्ता डा. शिवकुमार यादवले प्रतिनिधिसभा विघटन संविधानमाथिको प्रहार भएको बताएका थिए। 

यसमा न्यायाधीश सपना प्रधान मल्लले प्रश्न गरिन्- यो सरकार/प्रधानमन्त्री संविधानको धारा ७६ को १ बमोजिम हो कि २ बमोजिम ?

जवाफमा ७६ को २ अनुसारको प्रधानमन्त्री भन्दै यादवले भने, ‘एउटा दलले सभामुख अर्कोले उपसभामुख लिएका छन्।’