विद्यार्थी बोकेको बस दुर्घटना, पाँच जना घाइते

मोरङ– मोरङको सुनवर्षीमा विद्यार्थी बोकेको बा २ ख ४५८ नम्बरको बस दुर्घटना हुँदा पाँच जना विद्यार्थी घाइते भएका छन्। 

आज (मंगलबार) बाक्लो हुस्सुका कारण दुर्घटना भएको बताइएको छ। बिहान डाइनियाबाट विद्यार्थी लिएर विराटनगर आउँदै गरेको बस अचानक अगाडि आएको मोटरसाइकललाई जोगाउने क्रममा दुर्घटना भएको बताइएको छ।  

विराटनगरको मेरिल्याण्ड कलेजका विद्यार्थी बोकेको बस सुनवर्सी नगरपालिका ९ को भेडुवाथानमा दुर्घटनामा परेको हो। हुस्सुका कारण केही नदेखिने अवस्थामा अगाडि मोटरसाइकल आइपुगेकाले बचाउने क्रममा दुर्घटना भएको प्रहरीको भनाइ छ। 

घाइते भएका विद्यार्थीमा रतुवामाई नगरपालिका ३ की १७ वर्षीया रेजिना घिमिरे, १६ वर्षीया श्रद्धा भट्टराई, मनिषा राजवंशी, निशा ताजपुरीया र विशालकुमार मण्डल रहेको इलाका प्रहरी कार्यालय रंगेलीले जनाएको छ।  घाइते विद्यार्थीलाई उपचारका लागि विराटनगर ल्याइएको छ। घाइते विद्यार्थी  सबैको अवस्था सामान्य छ।