‘संविधानमै नभएको कुरा प्रधानमन्त्रीलाई लाग्दैमा गर्न पाइन्छ श्रीमान् ?’ 

काठमाडौं– वरिष्ठ अधिवक्ता भीमार्जुन आचार्यले प्रधानमन्त्रीलाई संसद् विघटन गर्ने अधिकार हुँदै नभएको जिकिर गरेका छन्। 

संसद् विघटनविरुद्ध सर्वोच्च अदालतमा परेका रिटको पक्षमा बहस गर्दै आचार्यले भने, ‘संसदमा बहुमत भएको प्रधानमन्त्रीले अहिलेको संविधानअनुसार विघटनको ‘व’ पनि उच्चारण गर्न पाउँदैनन्। उनलाई कुनै अधिकार नै छैन संसद् विघटन गर्ने।’

संविधानसभामा भएको छलफलको रेकर्ड संवैधानिक इजलासमा मगाउन माग

प्रधानमन्त्री केपी ओली आफैंले आफूसँग बहुमत रहेको बताइरहेको प्रसंग उल्लेख गर्दै आचार्यले प्रश्न गरे, ‘संसदमा बहुमत भएको प्रधानमन्त्रीले कसरी संसद् विघटन गर्न सक्छ ? प्रधानमन्त्रीले राजनीतिक कारण भन्नुभएको छ, त्यसको औचित्य के हो ? त्यो पनि त प्रष्ट हुनुपर्छ।’

अदालतले पनि राजनीतिक विषयमा बोल्नुपर्ने बताउँदै आचार्यले भने, ‘संविधानभन्दा माथि कोही पनि छैन, न प्रधानमन्त्री न अरु कोही। प्रधानमन्त्रीले चाहे वा नचाहेर संसद् विघटन हुने होइन। संविधानमै नभएको विषयमा प्रधानमन्त्रीलाई लाग्दैमा विघटन गर्न पाइन्छ श्रीमान ?’ 

भीमार्जुनले बोल्दै गर्दा न्यायाधीशहरुले प्रतिप्रश्न पनि गरेका थिए।

संसद् विघटनविरुद्ध परेका रिटमाथि सर्वोच्च अदालतको संवैधानिक इजलासमा बहस जारी छ।