मकवानपुरका ४२ विद्यार्थीलाई न्यानाे कपडा वितरण

मकवानपुर– मकवानपुरका ४२ जना विद्यार्थीलाई न्यानो कपडा वितरण गरिएको छ। 

सहयात्राको आयोजना, समृद्धि फाइनान्सको सहयोग तथा योङ्ग पिकासोको समन्वयमा महादेवटारस्थित नटारम्भेश्वर आधारभुत विद्यालयका विद्यार्थीलाई न्यानो कपडा वितरण गरिएको हो। 

विद्यार्थीलाई स्वीटर, टोपी तथा मोजा वितरण गरिएको छ। कपडा वितरण कार्यक्रममा बोल्दै विद्यालयका प्रधानाध्यापक भीमसेन कठायतले न्यानो कपडाले विद्यार्थीलाई पढाइमा सहजता थप्ने, विद्यालयमा नियमित आउने वातावरण बन्ने विश्वास व्यक्त गरे। 

योङ्ग पिकासोका निर्देशक अजय देशारल न्यानो कपडाले विद्यार्थीलाई चिसोका कारण हुने रोगबाट जोगाउनुको साथै विद्यालयमा पनि नियमित हाजिर हुन सघाउ पुर्‍याउने बताए। 

शिक्षकले योजनाअनुसार अध्यापन गराएमा सिकाइ तथा नियमितता दुवै प्रभावकारी हुने भन्दै विद्यार्थीको मनोभावना बुझेर अगाडि बढ्न सकिने सहयात्राका निवर्तमान अध्यक्ष बालमुकुन्द आचार्यले जानकारी गराए। 

विपन्न विद्यार्थी पढ्ने नटारम्भेश्वर आधारभुत विद्यालयका अधिकांश विद्यार्थी जाडो याममा पनि पातलो सर्ट र चप्पलको भरमा विद्यालय आउने गरेका छन्। अधिकांशलाई विद्यालय पुग्न दुई घण्टासम्म हिँड्नु पर्ने बाध्यता छ।