‘भ्रष्टाचारमा डुबेको सरकारले लाख-करोडको कुरै गर्दैन अर्बको मात्रै हिसाब गर्छ’

काठमाडौं- नेपाली कांग्रेसका सह महामन्त्री प्रकाश शरण महतले नेपाली जनता कम्युनिस्टसँग वाक्कदिक्क भएको बताएका छन्।

नुवाकोट क्षेत्र १ (ख) ले गरेको विरोध सभामा बोल्दै सह महामन्त्री डा. महतले ओली नेतृत्वको सरकार भ्रष्टाचारमा लिप्त बनेको आरोप लगाए। ‘अहिले भ्रष्टाचार यति आकाशिएको छ कि लाख करोडको कुरै छैन, अर्बको मात्रै हिसाब किताब हुन्छ, यतिसम्म कि महामारीका बेला औषधि र उपकरण ल्याउँदासमेत उहाँहरुले कमिसन नखाई काम गर्न सक्नुभएन,’ उनले भने। 

भ्रष्टाचार र व्यथिति व्याप्त भएपछि जनता कम्युनिष्टसँग वाक्कदिक्क भएकाे नेता महतकाे तर्क छ।

नेकपाको आन्तरिक लुछाचुँडीका कारण संविधान र लोकतन्त्रमाथि प्रहार भएको उनले बताए। ‘प्रचण्ड र माधव नेपाललाई सत्ता नभई नहुने, ओलीजीले कुनै हालतमा नछाड्ने। कोभिड महामारीका बेलासमेत उहाँहरुको ध्यान जनताको उपचारमा भन्दा कुर्सीको झगडामा बित्यो,’ नेता महतले भने, ‘उहाँहरुको सत्ता र शक्तिको लुछाचुँडीका कारण संविधान र लोकतन्त्रमाथि ‘कु’ भएको छ, यो सर्वोच्च अदालतले सच्याउनुपर्छ।’ 

नेता महतले भने, ‘कांग्रेसले विरोध गर्दा पनि अहिल्यै विरोध गर्ने बेला भयो र ? भन्थे। तर, अहिले हेर्नुहोस् सरकारले कुन हदसम्म पुगेको छ।’

‘जनता पछुताइरहेका छन्, अहिले संविधान र लोकतन्त्रमाथि नै प्रहार हुन थालेपछि हामीले कांग्रेसलाई नै निर्वाचित गर्नुपर्ने रहेछ भन्ने अनुभूति जनताले गरेका छन्,’ उनले भने, ‘हामी जनताको भरोसालाई तोड्दैनौँ, सर्वोच्च अदालतले के निर्णय गर्छ ? त्यसको आधारमा हामीले आगामी बाटो तयार गर्नुपर्छ।’

उनले सर्वोच्चको फैसला कांग्रेसले स्वीकार गर्ने बताए। 

उनले प्रतिनिधिसभा विनाको राज्य व्यवस्था परिकल्पना नै गर्न नसकिने बताए।