टीकापुर घटना राजनीतिक हो पुनर्विचार गरियोस् : नारद मुनि

काठमाडौं– नेकपाकाे ओली समूहका केन्द्रीय सदस्य नारद मुनि रानाले कैलालीको टीकापुर घटना राजनीतिक भएकाले पुनर्विचार गर्न प्रधानमन्त्रीलाई आग्रह गरेका छन्।

धनगढीमा प्रदेशस्तरीय पार्टीको जनसभालाई सम्बोधनका क्रममा विघटित प्रतिनिधिसभा कैलाली निर्वाचन क्षेत्र नम्बर ५ का सांसदसमेत रहेका रानाले प्रधानमन्त्री केपी शर्मा ओलीसँग यस्तो आग्रह गरेका हुन्। 

‘टीकापुर घटना राजनीतिक हो प्रधानमन्त्री ज्यू अन्यायमा परेकालाई न्याय दिनुपर्छ,’ उनले भने, ‘यो जाति विशेषको घटना होइन यसमा पुनर्विचार गरियोस्।’

उनले औपचारिक रुपमा नेकपा विभाजित भइनसकेको बताए। केन्द्रीय सदस्य रानाले ताजा जनादेशमा जाने सरकारको निर्णयको औपचारिक रुपमा सुदूरपश्चिमबाट सुरू भएको भन्दै अब देशैभर अभियान अघि बढ्ने बताए।

उनले ओली नेतृत्वको नेकपालाई जनताले दुई तिहाइको बहुमत दिएर मुलुकको विकासका लागि अघि बढाउनुपर्ने बताए।