निर्वाचन केन्द्रित तयारीमा जुट्न प्रहरी महानिरीक्षकको निर्देशन

काठमाडौं- प्रहरी महानिरीक्षक शैलेश थापा क्षेत्रीले सरकारद्वारा घोषित निर्वाचनलाई मध्यनजर राखी आवश्यक तयारीमा जुट्न भर्खरै जिल्लामा सरूवा भएका प्रहरी अधिकृतहरुलाई निर्देशन दिएका छन्।

सरुवा भई जान लागेका प्रहरी उपरीक्षकहरु र प्रहरी नायव उपरीक्षकहरुलाई प्रहरी प्रधान कार्यालयमा बिहीबार आयोजित एक समारोहमा उनले आवश्यक निर्देशन दिएका हुन्।

‘हालको परिस्थितिलाई मनन र विश्लेषण गरी सोहीअनुरुपको कार्य योजना बनाई अगाडि बढ्नपर्छ,’ उनले भने, ‘हालको सुरक्षा चुनौती व्यवस्थापन, तस्करी तथा गुण्डागर्दी नियन्त्रणमा विशेष ध्यान जाओस्।’

आईजीपी क्षेत्रीले संगठनले लागू गरेको नेपाल प्रहरी कार्ययोजना र प्रहरी कर्मचारीले पालना गर्नुपर्ने आचारसंहिता लगायतका नीति निर्देशनलाई अक्षरस पालना गरी लागू गर्नुपर्ने बताए।

‘सेवाग्राहीले देख्ने र भोग्ने गरी प्रहरी कार्यमा सकारात्मक परिवर्तन आएमा तपाईको उपस्थिति सार्थक हुने हुनाले सबैले आफ्नो कर्तव्य र संगठनले दिएको जिम्मेवारी पूरा गर्नुहोला’ निर्देशनका क्रममा उनले भने। 

कार्यालय व्यवस्थापन, साधनस्रोतको उचित परिचालन र मर्मतसम्भार लगायतका दैनिक क्रियाकलापमा विशेष ध्यान दिई चुस्तदुरुस्त रुपमा प्रस्तुत हुनसमेत उनले निर्देशन दिएका छन्।

प्रहरी प्रधान कार्यालयले २१ पुसमा ३० जना प्रहरी उपरीक्षकहरु र ६९ जना प्रहरी नायव उपरीक्षकहरुको सरुवा गरेको थियो।