श्रीमतीको हत्या गरेर भागेका धनकुमार झुण्डिएको अवस्थामा मृत फेला

पाँचथर– बञ्चरो प्रहार गरी  श्रीमतीको हत्या गरेर फरार भएका एक व्यक्ति झुण्डिएको अवस्थामा मृत फेला परेका छन्। 

पाँचथरको हिलिहाङ ५ सुभाङका ३२ वर्षीय धनकुमार उभरकोटी घरबाट करिब तीन किलोमिटर पूर्व जंगलमा झुण्डिएको अवस्थामा फेला परेका हुन्।

गत पुस ९ गते मध्यराति  ३० वर्षीया श्रीमती दुर्गादेवी उभरकोटीको टाउकोमा बञ्चरो प्रहार गरी हत्या गरेपछि उनी फरार भएका थिए। बुधबार उनी गाउँकै जंगलमा झुण्डिएर मृत अवस्थामा फेला परेको जिल्ला प्रहरी कार्यालय पाँचथरले जनाएको छ। 

पात्ले (कटुस)को रुखमा प्लास्टिकको डोरीले पासो लगाई झुण्डिएको अवस्था स्थानीयवासीले शव देखेपछि प्रहरीलाई खबर गरेका थिए। 

शव गन्हाउने भएकाले करिब एक हप्ताअघि नै उनले आत्महत्या गरेको हुनसक्ने स्थानीयवासीले अनुमान गरेका छन्। 

फिदिमस्थित पाँचथर जिल्ला अस्पतालमा शव परीक्षण गरिएको जिल्ला प्रहरी कार्यालय पाँचथरले जनाएको छ। गत पुस ९ गते मध्यराति धनबहादुरले टाउकोमा बञ्चरोले प्रहार गर्दा दुर्गादेवीको मृत्यु भएको थियो। घटनापछि फरार धनबहादुरलाई प्रहरीले खोजी गर्दै आएको थियो।