१४ वर्षको अभ्यासले यो व्यवस्था गलत प्रमाणित भइसक्यो : कमल थापा  

हेटौंडा– राष्ट्रिय प्रजातन्त्र पार्टीका अध्यक्ष कमल थापाले १४ वर्षको अभ्यासले वर्तमान व्यवस्था गलत प्रमाणित भएको बताएका छन्।  

मकवानपुरको हेटौंडामा बुधबार आयोजित अगुवा कार्यकर्ता भेलालाई सम्बोधन गर्दै थापाले विदेशीको ग्रान्ड डिजाइनमा लादिएको वर्तमान व्यवस्था गलत भएको बताएका हुन्। 

थापाले विदेशीले नेपाललाई धार्मिक सांस्कृतिक उपनिवेश बनाउनको निमित्त धर्म निरपेक्षता, गणतन्त्र लादेको बताए। 

‘१४ वर्षको अभ्यासबाट वर्तमान व्यवस्था, प्रणाली र संविधानमाथि गम्भीर प्रश्न खडा भएको छ,’ उनले भने, ‘संसद विघटनको घटनाबाट मुलुक थप जटिलतातर्फ फसेको छ।’ 

यो जटिलतालाई अवसरको रुपमा सदुपयोग गरेर गलत बाटो सच्याउने साहस आवश्यक भएको थापाको भनाइ छ। 

एउटा राजा हटाएर सैयौं राजा जन्माएको व्यवस्था अब चल्न नसक्ने थापाको दाबी छ। 

२०६२/०६३ को आन्दोलनमा विदेशिको प्रभाव, प्रायोजन र लगानी रहेको बुझेर राप्रपा गणतन्त्र, धर्मनिरपेक्षता र संघीयताको विपक्षमा उभिएको अध्यक्ष थापाले बताए।