करेन्ट लागेर जंगली भालुको मृत्यु

उदयपुर- उदयपुर जिल्लाको कटारी नगरपालिकास्थित मिर्चैया-कटारी चुरेखण्डको जंगलमा हाइटेन्सन भोल्टेज विद्युत् तारको करेन्टका कारण जंगली भालुको मृत्यु भएको छ।

डिभिजन वन कार्यालय त्रिवेणी कटारीका अनुसार सिरहाको मिर्चैयाबाट कटारी खण्डमा विस्तार गरिएको उक्त विद्युत् तारबाट चिसो जमिनमा करेन्ट प्रवाह हुँदा सोमबार चुरे जंगलमा एक भालुको मृत्यु भएको हो।

डिभिजन वन त्रिवेणीका सहायक वन अधिकृत हीरालाल शर्माले मिर्चैयाबाट हाइटेन्सनको भोल्टेजबाट कटारी क्षेत्रमा विस्तार गरिएको विद्युत‍्काे तार चुरे जंगलका केही भाग र जमिनमा समेत प्रवाह हुने गरेका कारण सो क्षेत्रमा घुम्दै आएको जंगली भालु मृतावस्थामा भेटिएको बताए। 

नांगो तार र चिसो जमिन तथा हरियो रुखबिरुवा तारमा जोडिने गरेका कारण जंगल क्षेत्रमा विद्युत‍्काे उचित व्यवस्थापन नहुँदा यस क्षेत्रमा यस्ता घटना पटक-पटक भएको सहायक वन अधिकृत शर्माले बताए।

समयमै सम्बन्धित निकाय र विद्युत् प्राधिकरणले यस्ता समस्याको सामाधान नगरे अन्य घटना पनि हुन सक्ने कटारी त्रिवेणीका स्थानीयवासी घनश्याम कार्कीले बताए। रासस