प्रधानमन्त्री ओली ताप्लेजुङ जाने कार्यक्रम स्थगित

काठमाडौं- प्रधानमन्त्री केपी शर्मा ओली चीनको स्वशासित क्षेत्र तिब्बतसँगको सीमा निरीक्षणसहितका कार्यक्रममा सहभागी हुन ताप्लेजुङ जाने कार्यक्रम स्थगित भएको छ। 

मङ्सिर ५ गते बिहान प्रधानमन्त्री ताप्लेजुङ आउने कुरा  ताप्लेजुङका प्रमुख जिल्ला अधिकारी झरेन्द्रप्रसाद चापागाईँलाई जानकारी गराइएको थियो। 

‘प्रधानमन्त्री ताप्लेजुङ आउनुहुने भएपछि सुरक्षाको व्यवस्था र प्रधानमन्त्रीको कार्यक्रममा सहभागिताका लागि जाने क्रममा प्रधानमन्त्रीको सचिवालयबाट  ताप्लेजुङको कार्यक्रममा आउने समय स्थगन भएको आफूलाई जानकारी दिइएको’ प्रजिअ चापागाईँले बताए।  

जिल्लाको उत्तरी क्षेत्र र तिब्बतको सीमा क्षेत्र टिपताला भञ्ज्याङको निरीक्षण तथा फक्ताङ्लुङ गाउँपालिका ६ लेलेपको घुन्सामा निर्माण गरिएको स्वास्थ्य एकाइ कार्यालय उद्घाटनको कार्यक्रममा सहभागी हुन प्रधानमन्त्री ओली मङ्सिर ५ गते ताप्लेजुङ जाने तयारी थियो।

यता विश्वको तेस्रो अग्लो हिमाल कञ्चनजंघा हिमालको फेदी तथा तीन हजार ५०० मिटरमा अवस्थित घुन्सा गाउँमा प्रधानमन्त्री ओली आउने खबरले खुशीका साथ स्वागतद्वार निर्माण गरिएको थियो। 

गाउँ सरसफाइ, कार्यक्रमस्थल सजावटलगायतका सबै काम सकेको घुन्सा गाउँका स्थानीय टासीतेन्जी शेर्पाले जानकारी दिए। प्रधानमन्त्री ओलीसमक्ष घुन्सावासीले घुन्सा गाउँको विकास निर्माण तथा राज्यबाट थप सेवा सुविधाको मागपत्रसमेत तयार गरिसकेको स्थानीय शेर्पाले जाकारी गराए। 

भ्रमण कहिले गर्ने भन्नेबारे स्पस्टा पारिएको छैन।