मध्यरातमा कपनमा आगलागी : जलेर दाइको मृत्यु, बहिनी र भान्जा गम्भीर घाइते 

काठमाडौँ- काठमाडौँको कपनस्थित बालुवाखानी चोकमा आगलागी हुँदा एक जनाको मृत्यु भएको छ भने दुई जना घाइते भएका छन् ।

सोमबार राति नारायणबहादुर बस्नेतको घरमा आगलागी हुँदा नुवाकोट शिवपुरी गाउँपालिका–५ का कृष्णबहादुर तामाङको जलेर मृत्यु भएको हो । 

बस्नेतको घरको पहिलो तलामा डेरा गरी बस्ने तामाङको कोठाबाट आगो सल्किएको प्रहरीले जनाएको छ । मध्यरातमा आगलागी भएकाले समयमै निभाउन नसक्दा उनको जलेर मृत्यु भएको प्रहरीले बताएको छ । 

राति पौने १ बजेतिर आगलागी भएको हो । दमकल, प्रहरी र स्थानीय बासिन्दाको सहयोगमा दुई बजे तिर आगो नियन्त्रणमा लिइएको थियो ।

आगलागीमा परेर ३९ वर्षे कृष्णबहादुरलाई तिहारको टीका लगाउनका लागि नुवाकोटबाट आएकी उनकी बहिनी ३५ वर्षे विपना तामाङ र उनका छोरा ११ महिने दावा जलेर घाइते भएका हुन् ।

उनीहरुको कीर्तिपुर अस्पतालमा उपचार भइरहेको छ । विपनाको शरीरको ३० प्रतिशत तथा दावाको १२ प्रतिशत भाग जलेको डाक्टरले जानकारी दिएका छन् ।

विद्युत सर्ट भएर आगलागी भएको बताइए पनि यकिन कारण नखुलेको प्रहरीले जनाएको छ ।