हुम्लामा दुई  दिन लगातार हिमपात

हुम्ला– हुम्लामा दुई दिन लगातार हिमपात भएको छ। हिमपातले यहाँ चिसो ह्वात्तै बढेको छ। 

यो वर्ष जिल्लामा दोस्रोपटक हिमपात भएको हो। यसअघि कात्तिक १८ गते हिमपात भएको थियो।

जिल्लामा आइतबार र सोमबार दुई दिन लगातार हिमपात हुँदा चिसो बढेको स्थानीय राजबहादुर बोहराले बताए।

बिहानै तापक्रम माइनस सात डिग्री पुगेको छ। उत्तरी हुम्ला हिमपातले सेताम्मे भएको छ। 

हिमपातपछि तापक्रम माइनसममा झरेसँगै सदरमुकाम सिमकोटसहित उत्तरी नाम्खा गाउँपालिकामा अत्यधिक चिसो बढेको छ। 

मानिसहरु हिउँमा रमाउन थालेका छन्। आइतबार  बिहानै हिमपात हुँदा किसान खुशी भएका थिए। जेठासी बाली जौ, गहुँ र उवा छर्ने समयमा हिमपात हुँदा जोत्न सहज हुने भएपछि किसान खुशी भएका हुन्। 

सोमबार बिहानै हिमपात भएपछि किसानमा खुशीयाली छाएको स्थानीय कमल भण्डारीले बताए। लामो समय पानी नपरेकाले जमिन सुक्खा भएर जोत्न कठिन हुने चिन्ता लागेका बेला हिमपातले त्यसलाई सहज बनाउने भण्डारीले बताए। 

मंगलबार बिहानदेखि हुम्लाको मौसम सफा रहेको भए पनि हिमालहरु हिउँले सेताम्मे हुनुका साथै चिसो बढेको छ।