नेकपाको सचिवालय बैठक आज, ओली-प्रचण्ड आआफ्नै रणनीतिमा

काठमाडौं- लामो समयको रस्साकस्सी र बहुमत सचिवालय सदस्यको दबाबपछि आज सत्तारुढ नेकपाको सचिवालय बैठक बस्दैछ । 

अपरान्ह ४ बजे बालुवाटारस्थित प्रधानमन्त्री निवासमा बैठक बस्न लागेको हो । बैठकमा छलफलका लागि कुनै ठोस एजेण्डा तय नभएको स्रोतले जनाएको छ। 

तर, अध्यक्ष पुष्पकमल दाहाल प्रचण्डसहितका नेताहरुले प्रधानमन्त्रीसमेत रहेका अध्यक्ष केपीशर्मा ओलीको कार्यशैली र पूर्व सहमतिको पालना नगरेको विषय जोडदाररुपमा उठाउने तयारी गरेका छन् ।  

त्यसका लागि अध्यक्ष प्रचण्डसहितका नेताहरु आफ्नो रणनीति बनाउन आन्तरिक छलफलमा जुटेका छन् । ओली पनि आफू निकटका नेताहरुसँग छलफल व्यस्त भएको स्रोतको दाबी छ। 

कार्यकारी अध्यक्ष प्रचण्ड र वरिष्ठ नेता माधव कुमार नेपालसहितका बहुमत सचिवालय सदस्यहरू ओलीले पार्टीभित्र सल्लाह नै नगरी महत्वपूर्ण राजनीतिक नियुक्तिलाई निरन्तरता दिएपछि रूष्ट छन् ।

२६ भदौको पार्टी  स्थायी कमिटी बैठक र विवाद समाधानका लागि गठित कार्यदलले दिएको म्यान्डेट विपरित ओली अघि बढिरहेपछि उनीहरुको निष्कर्ष छ । 

स्रोतका अनुसार अब बस्ने सचिवालय बैठकमा स्थायी समिति बैठकको माग गरिने छ। उक्त बैठकमार्फत ओलीविरुद्ध निर्णय गराउने प्रचण्डसहितका बहुमत सचिवालय सदस्यको तयारी छ । 

एकलौटीरूपमा राजदूत सिफारिस, मन्त्रिमण्डल पुनर्गठन, कर्णाली प्रदेशका मुख्यमन्त्रीविरूद्ध ल्याइएको अविश्वासको प्रस्ताव र ‘रअ’ प्रमुखसँग प्रधानमन्त्री ओलीले भेटेपछि नेकपाभित्रको विवाद उत्कर्षमा पुगेको छ ।

यता, ओलीले भने पार्टीको काममा केन्द्रित हुन छाडेर प्रचण्डले स–साना नियुक्तिमा भाग खोजेको र सरकारी काममा हस्तक्षेप गरेको भन्दै आपत्ति जनाउँदै आएका छन् । 

ओली स्थायी समिति बैठक नडाक्ने र सचिवालयमै सबै मुद्दा मिलाउने गरी सक्रिय भएका छन् । उनले उपाध्यक्षसमेत रहेका सचिवालय सदस्य वामदेव गौतमलाई आफ्नो क्याम्पमा तान्ने प्रयास गरिराखेका छन् । 

ओली समुहमा गौतम आए भने ९ सदस्यीय सचिवालयमा ओलीको बहुमतमा पुग्नेछ । जसबाट प्रचण्ड नेपाल समुहले चाहेजस्तो निर्णय हुनबाट रोकिने छ ।