युराेप-अमेरिकादेखि भारतसम्मै फेरि बढ्यो कोरोना, दिल्लीमा तेस्रो लहर

कोरोना भाइरसको प्रकोप नियन्त्रणमा आउन थालिसकेको भारत, युरोपेली मुलुकहरु र अमेरिकामा फेरि संक्रमण बढ्न थालेको छ। 

बीबीसीका अनुसार बेलायतमा कोरोनाबाट मृत्यु हुनेको संख्या ५० हजार नाघेको छ। युरोपमा सबैभन्दा बढी मृत्यु बेलायतमै भएको छ।

कोरोनाबाट हुने मृत्युको हिसाबले बेलायत विश्वको पाँचौं देश भएको छ। 

सबैभन्दा बढी मृत्यु अमेरिकामा भएको छ। दोस्रोमा ब्राजिल, तेस्रोमा भारत र चौथो नम्बरमा मेक्सिको छ। 

महामारी सुरु भएयता बेलायतमा १२ लाखभन्दा बढीलाई संक्रमण भइसकेको छ। 

यता भारतमा हिजो बुधबारसम्ममा कोरोना संक्रमितको संख्या ८६ लाख ८३ हजार नाघेको छ। पछिल्लो २४ घण्टामा मात्र करिब ४८ हजार संक्रमित थपिएका छन्। अहिलेसम्म मृतकको संख्या १ लाख २८ हजार नाघेको छ।  

नयाँ दिल्लीमा कोरोना संक्रमणको तेस्रो लहर सुरु भएको बताइएको छ। त्यहाँ पछिल्लो २४ घण्टामा मात्र ८ हजारभन्दा बढी संक्रमित थपिएका छन्। अहिलेसम्म दिल्लीमा ७ हजारभन्दा बढीको मृत्यु भइसकेको छ। 

कोरोना भाइरसबाट सबैभन्दा प्रताडित अमेरिकाको न्युयोर्कमा नयाँ प्रतिबन्धहरु घोषणा गरिएको छ। त्यहाँका मेयर बिल दे ब्लासिओले कोरोनाको दोस्रो लहर रोक्न यो आखिरी मौका हुने बताएका छन्। 

नयाँ प्रतिबन्धअनुसार बार तथा जिम राति १० बजे बन्द हुनेछन्। १० जनाभन्दा बढी समूहमा भेला हुन पाइने छैन। 

अमेरिकामा नयाँ संक्रमणको उछाल नै आएको छ। पछिल्लो २४ घण्टामा त्यहाँ झन्डै ६२ हजार मानिसलाई अस्पताल भर्ना गरिएको छ। अमेरिकामा दैनिक औसत ९०० जना कोरोना संक्रमितको मृत्यु भइरहेको छ। 

अमेरिकामा चालू महिना नोभेम्बरको १० दिनमै १० लाखभन्दा बढी संक्रमित थपिएका छन्। संक्रमितको संख्या हालसम्म १ करोड नाघिसकेको छ। मृतकको संख्या २ लाख ३९ हजार नाघेको छ।  

जानकारहरुका अनुसार निकट भविष्यमै अमेरिकाका अस्पताल कोरोना संक्रमितले भरिँदैछन्। टेक्सास, विस्कोन्सिन, मिनेसोटो, क्यालिफोर्निया, फ्लोरिडा संक्रमण तीव्र गतिमा फैलिरहेको अमेरिकी सञ्चारमाध्यमले जनाएका छन्।