पूर्वराज्यमन्त्री गौचनको निधन 

पोखरा– पूर्वराज्यमन्त्री ओमकारप्रसाद गौचनको निधन भएको छ। 

विसं १९९२ मा बागलुङ नगरपालिका ३ नारायणचोकमा जन्मिएका ८५ वर्षीय गौचनको उपचारका क्रममा काठमाडौंको दीर्घायु अस्पतालमा बुधबार निधन भएको हो । 

उनी विसं ०४३ मा स्वास्थ्य राज्यमन्त्री भएका थिए। गौचन ०३६ सालमा खाद्य, कृषि तथा सञ्चार राज्यमन्त्री पनि भएका थिए ।
त्यसअघि उनी शिक्षा र सञ्चार सहायक मन्त्रीसमेत बनेका थिए। 

गौचन ०२४ मा बागलुङ जिल्लाबाट राष्ट्रिय पञ्चायतको सदस्यमा निर्वाचित भएका थिए । ०४८ को चुनावमा गौचन कांग्रेसका तर्फबाट बागलुङ क्षेत्र नं ३ को सांसदमा निर्वाचित भएका थिए ।

उनी पत्रकारितासँग समेत सम्बद्ध थिए । ००८ सालमा ‘सहीबाटो’ नामको पत्रिका हातैले लेखेर प्रकाशन गरेका थिए। 

०१५ सालको आमचुनावमा बीपी कोइरालाले उम्मेदबार बनाउन खोज्दा ‘सानै उमेरको छु’ भनेर उनी उम्मेदवार हुन नचाहेको राजनीतिकर्मीहरू बताउँछन् ।