भेटिएनन् आइसोलेसनबाट भागेका संक्रमित

पोखरा-  पोखरा महानगरपालिकाको आइसोलेसनबाट भागेका एक संक्रमित दुई दिन बित्दा पनि भेटिएका छैनन्। 

कृषि तालिम केन्द्र, मालेपाटनको आइसोलेसनमा बसेका ३५ वर्षे ती संक्रमित बेलुकाको खाना पछि भागेका थिए । 

उनको खोजीका लागि घरवरपर सिभिल ड्रेसमा प्रहरी खटिएर निगरानी राखेको जिल्ला प्रहरी कार्यालय, कास्कीका प्रहरी नायब उपरीक्षक (डीएसपी) सुवास हमालले बताए। 

‘उनी कास्कीभित्रै लुकेर बसेको आशंकामा खोजी गरिरहेका छौं,’ उनले भने । 

बुटवल घर भई पोखरा बस्दै आएका ती संक्रमितमा १५ कात्तिकमा कोरोना संक्रमण पुष्टि भएको थियो। 

त्यसपछि पोखरा महानगरपालिकाले सञ्चालन गरेको मालेपाटनको आइसोलेसनमा राखिएको थियो । उनी मासु व्यवसायी हुन् ।
दसैंका बेला ल्याएको च्यांग्राको रकम भुक्तानी नगरेको आरोपमा उनीमाथि जिल्ला अदालतमा मुद्दा दायर भएको थियो। 

उक्त मुद्दामा अदालतले मागेको धरौटी बुझाउन नसकेपछि उनी जेल चलान भएका थिए ।

आइसोलेसनमा आएपछि पत्नीले धरौटी रकम अदालतमा बुझाएर रिहाइको पत्र हात परिसकेको भए पनि उनी किन भागे थाहा हुन सकेको छैन। 

उनलाई कोरोना देखिएपछि श्रीमतीको जिम्मा लगाएर धरौटीमा छाडिएकाले उनी नभेटिए श्रीमतीलाई पनि कारबाही गरिने डीएसपी हमालले बताए। मालेपाटनको आइसोलेसनमा ५० जना संक्रमित बस्दै आएका छन्।