ट्रकको ठक्करबाट ज्यान गुमाउने एउटै मोटरसाइकलमा सवार तीनै जनाको सनाखत

दाङ– दाङको राप्ती गाउँपालिका ४ मौरीघाटमा मंगलबार राति दुर्घटनामा परि मृत्यु भएका तीन जना युवाको परिचय खुलेको छ। 

मृतक तीनै जना राप्ती गाउँपालिकाका भएको जिल्ला प्रहरी कार्यालय दाङले जनाएको छ। कार्यालयका प्रवक्ता डीएसपी सुमित खड्काका अनुसार दुर्घटनामा परि मृत्यु हुनेमा राप्ती गाउँपालिका २ लालमटियाका १८ वर्षीय कसम पुन,  वडा नम्बर ५ सिसहनियाका १६ वर्षीय मनोज गाहा र राप्ती ८ पिपरीका १८ वर्षीय दिनेश घर्ती रहेका छन्।  

पूर्व–पश्चिम राजमार्गको राप्ती गाउँपालिका ४ मौरीघाटमा मंगलबार राति करिब ८ बजेतिर उनीहरु दुर्घटनामा परेका थिए। 

पश्चिमबाट भालुवाङतर्फ आइरहेको ना ६ ख ३३४४ नम्बरको ट्रकले पूर्वबाट गइरहेको उनीहरु सवार रा ५ प ६७३७ नम्बरको मोटरसाइकललाई ठक्कर दिएको थियो।  

दुर्घटनापछि तीनै जना युवाको  घटनास्थलमै मृत्यु भएको जिल्ला प्रहरी कार्यालयका प्रवक्ता खड्काको भनाइ छ।  

उनीहरुलाई उपचारका लागि  लमही अस्पताल लगिए पनि चिकित्सकले सबैलाई मृत घोषणा गरेका थिए। 

मृतक युवाहरुसँग कुनै कागजात नभएकाले परिचय खुल्न ढिला भएको हो। 

 ट्रक पनि सडकमै पल्टिएकाले दुर्घटनाको कारण तीब्र गति हुनसक्ने अनुमान प्रहरीको छ।  यद्यपि चालक फरार रहेकाले उनी पक्राउ परेपछि थप अनुसन्धान हुने प्रहरीको भनाइ छ।