प्रदेश १ का संक्रमितमध्ये ३५.७३ प्रतिशत महिला

विराटनगर– प्रदेश १ मा मंगलबारसम्ममा कोरोना संक्रमितको संख्या २२ हजार ५१३ पुगेको छ। संक्रमित भएका मध्ये १४ हजार ४६९ पुरुष र ८ हजार ४४ महिला छन्।

समग्रमा संक्रमित महिलाको प्रतिशत ३५.७३ छ। कुल संक्रमण भएका मध्ये ६४.२७ प्रतिशत पुरुष रहेको सामाजिक विकास मन्त्रालयले जनाएको छ।  

मन्त्रालयका अनुसार उमेर समूहमा २१–३० बर्षका बढी संक्रमित भएका छन्। सो उमेर समूहका २७.७१ प्रतिशत संक्रमित भएका छन्। ३१–४० का २४.१७, ४१–५० का १६.१२, ५१–६० का ११.७७, १०–२० का ८.३१, ६१–७० ५.५८, ७१ देखि माथि ३.७२, ०–१० बर्ष उमेर समूहका २.६६ प्रतिशत संक्रमित भएका छन्। 

२१ देखि ६० बर्ष उमेर समूहका मात्रै करिब ८० प्रतिशत संक्रमित भएको सामाजिक विकास मन्त्रालयको कोभिड १९ निगरानी, तथ्याङ्क संकलन तथा अनुगमन समितिका संयोजक डा. रविन्द्र निरौलाले बताए।   

प्रदेश १ मा ६८ प्रतिशत कोरोना संक्रमणमुक्त भएका छन्। पछिल्लो समय दैनिक संक्रमण मुक्त हुनेको संख्या बढ्दै गएको छ। संक्रमितको तुलनामा डिस्चार्ज हुने बढी देखिएको छ। मंगलबारसम्म १५ हजार ३१५ जना संक्रमणमुक्त भएका छन्। संक्रमणमुक्त हुनेमा ५२६१ महिला र १० हजार ५४ पुरुष छन्। 

प्रदेश १ मा मंगलबार ३१५ जना कोरोना संक्रमित थपिएका छन्। मोरङमा १००, झापामा ८३, सुनसरीमा ७९, उदयपुरमा १४, धनकुटामा १३, भोजपुरमा ३, ओखलढुङ्गा, संखुवासभा, तेह्रथुम र खोटाङमा २–२, इलाम र पाँचथरमा १–१ र प्रदेश १ बाहिरका १३ जना रहेको सामाजिक विकास मन्त्रालयले जनाएको छ।