पोखराको आइसोलेसनबाट कोरोना संक्रमित भागे 

पोखरा– पोखराको मालेपाटनस्थित आइसोलेसनबाट सोमबार राति एकजना कोरोना संक्रमित भागेका छन्।

साँझ ७ बजे बेलुकाको खाना आएपछि एकछिन माथिको तलामा गएर साथीसँग कुरा गर्छु भनेका ती संक्रमित छलबाट हामफालेर भागेको जिल्ला प्रहरी कार्यालय कास्कीका प्रवक्ता डिएसी सुवास हमालले बताए।

बुटवल घर भई पोखरा बस्दै आएका ३५ वर्षीय संक्रमितलाई कात्तिक १५ गते पोखरा महानगरपालिकाले सञ्चालन गरेको मालेपाटनको आइसोलेसनमा राखिएको थियो। उनी मासु व्यवसायी हुन्।

दसैंका बेला च्यांग्रा भनेर च्यांग्रीको मासु बेचेको आरोपमा उनीमाथि जिल्ला अदालतमा मुद्दा दायर भएको थियो। सो मुद्दामा अदालतले मागेको धरौटी बुझाउन नसकेपछि उनी जेल चलान भएका थिए। 

आइसोलेसमा आएपछि पत्नीले धरौटी रकम अदालतमा बुझाएर रिहाइको पत्र हात परिसकेको भए पनि उनी किन भागे थाहा हुन सकेको छैन। प्रहरीले उनको खोजी गरिरहेको छ।

मालेपाटनको आइसोलेसनमा ५० जना संक्रमित बस्दै आएका छन् ।