ओलीले एक्लै भेट्न बोलाउँदा नेताहरु लिएर गए नेपाल, दुई घण्टाको छलफलमा कुनै निष्कर्ष निस्किएन

काठमाडौं– सत्तारुढ दल नेकपाका अध्यक्ष तथा प्रधानमन्त्री केपी शर्मा ओलीले पार्टीका वरिष्ठ नेता माधवकुमार नेपाललाई आफ्नो निवास बालुवाटारमा बोलाएर पार्टीभित्र देखा परेको विवाद समाधानका लागि सहयोग गर्न आग्रह गरेका छन्। 

ओलीले नेपालसँग एक्लै भेट्न बोलाएको भए पनि नेपालले भने आफू निकट स्थायी कमिटी सदस्यहरु भीम रावल, सुरेन्द्र पाण्डे र रघुजी पन्तलाई पनि लिएर गएका थिए। 

भेटपछि पाण्डेले अध्यक्ष ओलीसँग दुई घण्टा छलफल भएको जानकारी दिँदै पार्टी बचाउनका लागि सहयोग गर्न ओलीले नेपाललाई अनुरोध गरेको बताए। ‘पार्टीमा संकट आइपरेको छ, समाधानका लागि सहयोग गर्नुप¥यो,’ ओलीले नेपाललाई गरेको आग्रह उद्धृत गर्दै पाण्डेले भने। पार्टी अहिलेसम्मकै दयनीय अवस्थामा पुगेको भन्दै ओलीले माधव नेपालको सहयोग मागेको पाण्डेले बताए। 

जवाफमा नेपालले ‘यो तरिकाले पार्टीको हित हुँदैन, सरकारको पनि हित हुँदैन। किन यसो गर्दै हुनुहुन्छ ? गम्भीर बन्नुस्, सचिवालय बैठक डाक्नुस्। गुटको भेला गर्नु भएन’ भन्दै ओलीसँग असन्तुष्टि व्यक्त गरेका थिए। 

नेता नेपालले पार्टी यो अवस्थामा पुग्नुमा ओली नै प्रमुख कारक रहेको तर्क गरेका थिए। उनले आफू पार्टी एकताको पक्षमा रहेको भन्दै प्रधानमन्त्री लचक बने समस्या समाधान हुने बताएका थिए।

कार्यकारी पुष्पकमल दाहालसहित सचिवालयका ५ नेताले बैठक बोलाउन माग गर्दै ओलीलाई पत्र बुझाएको भोलिपल्ट नेपाल ओली छलफल भएको हो ।