विराटनगरमा थप दुई संक्रमितको मृत्यु

विराटनगर– विराटनगरमा विहीबार दिउँसो थप दुई जना कोरोना संक्रमितको मृत्यु भएको छ। मृत्यु हुने दुवै जना सुनसरी इटहरीका हुन्। 

इटहरी–१८ का ५५ वर्षीय पुरुषको दिउँसो ३ः३० बजेतिर नोबेल शिक्षण अस्पतालमा मृत्यु भएको हो। श्वासप्रश्वासमा समस्या भएकोभन्दै पुरुषलाई उपचारका लागि कात्तिक १७ गते अस्पताल भर्ना गरिएको अस्पतालका प्रबन्धक नारायण दाहालले बताए। पीसीआर परीक्षण गराउँदा भोलिपल्ट रिपोर्ट पोजेटिभ आएपछि थप उपचारका लागि आइसोलेसनमा भर्ना गरिएको दाहालले बताए। 

इटहरी–४ का ७१ वर्षीय वृद्ध पुरुषको न्युरो अस्पतालमा दिउँसो ३ः१५ बजेतिर मृत्यु भएको छ। श्वासप्रश्वासमा समस्या भएपछि कात्तिक १७ गते उपचारका लागि भर्ना गरिएका उनको पीसीआर परीक्षण गराउँदा त्यही दिन रिपोर्ट पोजेटिभ आएको अस्पतालका प्रशासकीय अधिकृत सुरेश आचार्यले बताए । 

सुनसरी र मोरङमा पछिल्लो २४ घण्टामा ८ जनाको मृत्यु भएको छ ।