अमेरिकी राष्ट्रपति निर्वाचन : बाइडेन जित नजिक

काठमाडौं- अमेरिकी राष्ट्रपति पदको निर्वाचनमा डेमोक्रेटिक उम्मेदवार जो बाइडेन जित नजिक पुगेका छन् । 

राष्ट्रपतिमा निर्वाचित हुन २७० इलेक्टोरल भोट चाहिनेमा बाइडेनले अहिलेसम्म २५३ इलेक्टोरल भोट पाएका छन् । 

उनका प्रतिस्प्रर्धी रिपब्लिकन उम्मेदवार डोनाल्ड ट्रम्पले अहिलेसम्म २१४ इलेक्टोरल भोट प्राप्त गरेको अमेरिकी समाचार संस्था सीएनएनले लेखेको छ । 

बुधबारसम्म कडा प्रतिस्पर्धा देखिएको अमेरिकी चुनावमा बिहीबार बिहानबाट बाइडेनले ३९ इलेक्टोरल भोटले अग्रता लिएका छन् । 

हाल हुलाकबाट गरिएको मतदानको मतगणना जारी रहेको छ । हुलाकबाट गरिएको मतदानको मतगणनाका लागि समय लाग्ने निर्वाचन अधिकारीहरुलाई उदृत गर्दै सीएनएनले उल्लेख गरेको छ । 

मुख्य ब्याटलग्राउन्ड स्टेट पेन्सभानिया, विसकन्सिन र मिसिगनलगायतका राज्यमा मतगणना जारी रहेको छ । मिसिगनका निर्वाचन प्रमुखले अझै एक लाख मतगणना बाँकी रहेको बताएका छन् ।

हारको जोखिम बढेसँगै बहालवाला राष्ट्रपति ट्रम्पले पेन्सल्भेनियामा धाँधली भएको दाबी गर्दै मतगणना रोक्न माग गरेका छन् । 

यद्यपि उनले धाँधली भएको स्पष्ट प्रमाण पेश गरेका छैनन् । उनले मतगणना रोक्न माग गर्दै सर्वोच्च अदालत जाने चेतावनीसमेत दिएका छन् ।

बाइडेन पक्षले भने ट्रम्पले अपमानजनक टिप्पणी गरेको भन्दै मतगणना नरोकिने जनाएको छ ।