अस्ट्रेलियामा आन्तरिक कोरोना संक्रमण शून्यमा झर्‍यो

काठमाडौं- अस्ट्रेलियामा कोरोना भाइरसकाे आन्तरिक संक्रमण पाँच महिनापछि शून्यमा झरेको छ। 

पछिल्लो २४ घण्टामा कुनै पनि आन्तरिक संक्रमण पुष्टि नभएको त्यहाँका स्वास्थ्य अधिकारीहरुले जनाएका छन्। 

अस्ट्रेलियामा ९ जुनयता ५ महिनापछि आन्तरिक संक्रमण शून्यमा झरेको हो। भिक्टोरिया राज्यमा कोरोना भाइरस संक्रमणको दोस्रो लहर चलेको थियो। 

जहाँ १ सय १२ दिनको लकडाउनपछि दोस्रो दिन आन्तरिक संक्रमण शून्यमा झरेको छ। संक्रमण दर शुन्यमा झरेपछि स्वास्थ्य अधिकारीहरुले अब धेरै क्षेत्रमा रहेका प्रतिबन्धहरु हटाउन सकिने बताएका छन्। 

‘हाम्रा सबै अद्भूत स्वास्थ्य संयन्त्र र सार्वजनिक स्वास्थ्य कार्यकर्ता एवम् अन्य सबै अस्ट्रेलियावासीलाई धन्यवाद।’ स्वास्थ्य मन्त्री जर्ज हन्टले ट्वीटरमा लेखेका छन्। अस्ट्रेलियामा हालसम्म २७ हजार ५ सयमा कोरोना संक्रमण पुष्टि भएको छ। जसमध्ये ९ सय जनाको मृत्यु भइसकेको छ। 

झण्डै २ करोड ५० लाख जनसंख्या रहेको अस्ट्रेलियामा लकडाउनपछि कन्ट्याक्ट ट्रेसिङ र परीक्षणलाई व्यापकता दिइएको थियो। 
कोरोनाबाट मृत्यु हुनेमध्ये झण्डै ९० प्रतिशत रहेको भिक्टोरियामा लकडाउनका नियम निकै कडा पारिएको थियो। 

अस्ट्रेलियामा पछिल्लो २४ घण्टामा जम्मा ५ जनालाई कोरोना पुष्टि भएको थियो, ती संक्रमित अन्य देशबाट प्रवेश गरेका हुन्।