पूर्व प्रहरी सहायक निरीक्षकको हत्या, हत्या आरोपी पक्राउ

धनगढी- पूर्व प्रहरी सहायक निरीक्षक तेजबहादुर पालका हत्या आरोपी पक्राउ परेका छन्। 

हत्या आरोपमा दार्चुलाको लेकम गाउँपालिका ४, टकनाका ४८ वर्षीय पालको हत्या आरोपमा सोही ठाउँका ३२ वर्षीय रमेश पाल पक्राउ परेको प्रहरीले जनाएको छ। 

घरभन्दा ६ मिटर टाढा टाउकोमा लठ्ठी प्रहार गरेको अवस्थामा शनिबार पालको शव भेटिएको जिल्ला प्रहरी कार्यालय दार्चुला प्रहरी नायव उपरीक्षक पदमबहादुर बिष्टले बताए। 

रिठातौपताबाट प्रहरी नायव निरीक्षक लोकेन्द्र पुजारा र ईलाका प्रहरी कार्यालय गोकुलेश्वरबाट प्रहरी निरीक्षक खगेन्द्रसिंह साउँदको नेतृत्वमा घटनास्थल पुगेको प्रहरी टोलीले छानबिन गर्दा हत्या भएको खुलेको थियो।  

‘टाउकोमा लठ्ठीले प्रहार गरेर हत्या गरेको प्रारम्भिक अनुसन्धानबाट खुलेको छ,’ प्रहरी नायव उपरीक्षक पदमबहादुर बिष्टले भने, ‘हत्या गरेर फरार रहेका रमेश पाललाई पक्राउ गरिएको छ।’

हत्या गरेर फरार रहेका रमेशलाई प्रहरी चौकी सेरा बैतडीको सहकार्यमा आइतबार बिहान ७ बजेतिर पक्राउ गरिएको प्रहरी नायव उपरीक्षक बिष्टले बताए।